నేతాజీ మరణంపై మరో కొత్త వాదన.. అలా చనిపోలేదట

Posted: 07/17/2017 12:18 PM IST

French report suggests netaji subhash chandra bose was alive in 47

స్వాతంత్ర్య సంగ్రామంలో తెల్లదొరలకు తన ఆజాద్ హింద్ ఫౌజ్ తో వెన్నులో వణుకు పుట్టించిన ధీరుడు నేతాజీ సుభాష్‌ చంద్రబోస్ మరణం ఇవాళ్టికీ మిస్టరిగానే వుంది. ఈ విషయంలో ఇప్పటికీ ఎన్నో అనుమానాలు.. వాదనలు తెరపైకి వచ్చాయి. ఆయన ఎలా మరణించారన్న విషయమై ఇంకా స్పష్టతమాత్రం రాలేదు. అయితే ఆయన విమాన ప్రమాదంలో మృతి చెందారని, లేదు మారువేషంలో భారత్‌లోనే జీవించారని.. ఇలా భిన్నమైన వాదనలు ఇంకా వినిపిస్తూనే ఉన్నాయి.

భారత ప్రభుత్వం.. నేతాజీ మృతిని ధ్రువీకరించేందుకు ఇప్పటివరకు మూడు కమిటీలు వేసింది. వాటిలో రెండు బోస్‌ విమాన ప్రమాదంలో మరణించారని తేల్చగా.. చివరగా 1999లో వేసిన ముఖర్జీ కమిషన్‌ మాత్రం దీనికి భిన్నమైన వాదనను వినిపించింది. బోస్‌ విమాన ప్రమాదంలో మరణించలేదని తేల్చింది. అయితే ఈ కమిటీ నివేదికను కేంద్ర ప్రభుత్వం తిరస్కరించింది. అంతకుముందు వేసిన రెండు కమిటీలు జపాన్‌ ఆక్రమణలో ఉన్న తైపీలో 1945 ఆగస్టు 18న జరిగిన విమాన ప్రమాదంలో నేతాజీ మరణించారని తేల్చాయి. ఇందుకు బ్రిటన్‌, జపాన్‌ దేశాలు ప్రకటనలే నిదర్శంగా చూపాయి.

తాజాగా పారిస్‌కు చెందిన జేబీబీ మోర్ అనే పరిశోధకుడు.. బోస్ విమాన ప్రమాదంలో మరణించలేదన్న వాదనను తెరపైకి తీసుకువచ్చారు. ఫ్రాన్స్ గూఢచర్య సంస్థకు సంబంధించిన ఓ నివేదికను ఇందుకు ఆధారంగా ఆయన చూపించారు. 1947, డిసెంబరు 11నాటి ఆ నివేదిక నేతాజీ ఇండో చైనా ప్రాంతం నుంచి పారిపోయారని.. అయితే ఆయన ఎక్కడ ఉన్నారన్న దానిపై సమాచారం లేదని పేర్కొందని మోర్ చెప్పారు. నేతాజీ మృతికి సంబంధించిన ప్రస్తావనే అందులో లేదని అన్నారు.