ఆ క్రిమినల్ తలతో ఏం మెసేజ్ ఇద్దామని?

Posted: 06/12/2017 10:21 AM IST

చరిత్రలో నిలిచిపోయే మహోన్నత వ్యక్తుల జ్నాపకాలను ఆయా దేశాలు పదిలంగా భద్రపరచటం చూస్తున్నాం. విప్లవకారుడు, రష్యా రాజకీయవేత్త వ్లాదిమిర్‌ లెనిన్‌ మృతి చెంది 90 ఏళ్లు గడుస్తున్నా ఇప్పటికీ ఆయన భౌతికకాయం అలాగే భద్రపరిచారు. మ్యాసోలియంలో రసాయనాలతో ఆయన మృతదేహాన్ని పాడవకుండా చూసుకుంటున్నారు. భావితరాలకు లెనిన్ ఔనత్యం చెప్పాలన్న ఉద్దేశ్యంతోనే ఈ పనికి పూనుకున్నారు. ఇక పోప్ జాన్ పాల్ 2 అద్భుతాలు చేశారని, ఆయనకు సెయింట్ హుడ్ ఇచ్చే అవకాశం ఉందని వార్తలు వెలువడ్డాక, ఆయన గొప్పతనాన్ని చాటేందుకు కూడా పార్థివ దేహాన్ని అలాగే భద్రపరిచారు. కానీ, ఓ నేరస్థుడి తలను 176 ఏళ్లుగా జాగ్రత్తగా భద్రపరిచి ఆసక్తికర చర్చకు దారితీసింది పోర్చుగల్‌.

డియోగొ అల్వెస్‌ దొంగ కమ్ సీరియల్‌ కిల్లర్‌. 1810లో గాలిసియాలో డియోగో అల్వేస్ జన్మించి, పోర్చుగల్‌ కి అల్వేస్ వలస వెళ్లాడు. అక్కడ పెరుగుతూ దొంగగా మారాడు. పోర్చుగల్ లోని ఓ పెద్ద కాలువ వద్ద నిలబడి అటుగా వచ్చే రైతులను దోచుకునేవాడు. ఎదురు తిరిగితే వారిని కాలువలోకి తోసేసి కిరాతకంగా చంపేవాడు. అలా మూడేళ్లలో 80 మందిని దాకా చంపి మోస్ట్ వాంటెడ్ గా వార్తల్లో, పోలీసుల హిట్ లిస్ట్ లో నిలిచాడు.

దెబ్బకు కాలువను మూసేయటంతో రైతులు అటుగా రావడం మానేశారు. లాభం లేదనుకున్న డియోగో ఇళ్లలోకి దూరి మరీ దొంగతనాలు చేయటం ప్రారంభించాడు. చివరకు అతి కష్టం మీద అరెస్టు చేసి, 1841లో ఉరితీశారు. అసలు అతను దొంగగా ఎందుకు మారాడు? అన్న దానిపై తాము పరిశోధనలు చేస్తామని లిస్బన్‌ లోని మెడికల్‌ కాలేజీ బోధకులు, శాస్త్రవేత్తలు ప్రభుత్వంను కోరగా, అతని తలను వారికి అప్పగించింది. కానీ, ఎన్ని పరిశోధనలు చేసినా ఫలితం రాబట్టలేకపోయారు. పోర్చుగల్ లో ఉరిశిక్ష పడిన చివరి ఖైదీ డియోగోనే, పైగా అతి కిరాతకుడు కావడంతో అతని తలను ఫ్యాకల్టీ ఆఫ్‌ మెడిసిన్‌ ఆఫ్‌ ది యూనివర్శిటీ ఆఫ్‌ లిస్బన్ భద్రపరిచి నేరస్థులకు ఓ వార్నింగ్ మెసేజ్ అందిస్తున్నారు.