ఉద్యోగం పీకేశారని కాల్చి చంపాడు

Posted: 06/06/2017 07:41 AM IST

అగ్రరాజ్యంలో గన్ కల్చర్ ఆరుగురి ప్రాణాలను బలితీసుకుంది. ఫ్లోరిడాలో ఓ వ్యక్తి విచక్షణారహితంగా కాల్పులకు తెగబడి 5 గురిని దారుణంగా చంపేశాడు. ఆపై తాను కాల్చుకుని ఆత్మహత్య చేసుకున్నాడు. ఒర్లాండో పట్టణంలోని హ్యాంగింగ్‌ మాస్‌రోడ్డులోని ఒక పారిశ్రామికవాడలో సోమవారం ఉదయం ఘటన జరిగింది.

కంపెనీలో పని చేసే 45 ఏళ్ల ఓ ఉద్యోగిని ఇటీవలె తొలగించారు. దీంతో ఉన్మాదిగా మారిన అతగాడు కాల్పులకు తెగించినట్లు తెలుస్తోంది. ఘటనాస్థలిలోనే నలుగురు మృతిచెందగా.. మరొకరు ఆస్పత్రిలో చికిత్సపొందుతూ మృతి చెందారు. వారిలో ఓ మహిళ కూడా ఉన్నట్లు సమాచారం. ఇక చివరకు ఆ మాజీ ఉద్యోగి తనను తాను కాల్చుకుని ఆత్మహత్య చేసుకున్నాడు. కాల్పుల నుంచి ఏడుగురు సురక్షితంగా తప్పించుకున్నారని ఆరెంజ్ కౌంటీ షరీఫ్ సంస్థ ఓ ప్రకటనలో పేర్కొంది.

కాల్పులకు గల కారణాలపై స్పష్టత లేకపోవటంతో ఎఫ్ బీఐ రంగంలోకి దిగింది. ఇక గతేడాది సరిగ్గ జూన్‌ నెలలోనే( 12వ తేదీన) ఒర్లాండోలోనే ఓ నైట్‌క్లబ్‌లో జరిగిన కాల్పుల ఘటనలో 60 మందికి పైగా ప్రాణాలు కోల్పోయిన విషయం తెలిసిందే. సరిగ్గా ఏడాది తర్వాత మరోసారి కాల్పులు చోటుచేసుకోవడంతో ప్రజలు భయబ్రాంతులకు లోనౌతున్నారు. ఇక ఈ యేడాదిలో ఇలాంటి తరహా దాడి ఇది రెండోది కావటం విశేషం.