ఇదొక ఎమోషనల్ అమ్మ కథ

Posted: 05/13/2017 09:18 AM IST

31 ఏళ్ల అవినాష్ లోథీ మధ్యప్రదేశ్ బజల్ పూర్ కు చెందిన ఓ ప్రోఫెషనల్ ఫోటోగ్రాఫర్. ఇక్కడ మన కోసం గత నెలలో తన కంటికి చిక్కిన ఓ ఫోటోతో మాటల్లో వర్ణించలేని అనుభూతిని అందిస్తున్నాడు. సరదాగా ఓ గూడెంకు వెళ్లిన అతను అక్కడి కోతుల గుంపును ఓ ఫోటో తీశాడు. అందులో ఓ తల్లి కోతి అతని హృదయం కరిగేలా చేసింది. అంతే వెంటనే ఫోటోను క్లిక్ మనిపించాడు.

అమ్మ ప్రేమను మించింది సృష్టిలో లేదు. మనుషులకు మాత్రమే కాదు జంతువుల్లో కూడా ఉంటుంది. సరదాగా కోతులన్నీ ఆడుకుంటుండగా అందులో ఓ పిల్ల కోతి ఒక్కసారిగా అపస్మారక స్థితికి చేరుకుంది. దానిని యథాస్థితికి తీసుకొచ్చేందుకు తల్లి కోతి చేసిన ప్రయత్నం, ఆ సమయంలో పిల్లకోతిని చేత్తో కాస్త పైకి లేపి తల్లి కోతి ఏడుస్తూ ఉండటం ఆ దృశ్యాలన్నీ అవినాశ్‌ తన కెమెరాతో క్లిక్‌ మనిపించారు.

ఆ కోతి పిల్ల ప్రాణానికి ఎలాంటి ప్రమాదం జరగలేదు. కాసేపటి తరువాత అది మళ్లీ మామూలు స్థితికి వచ్చేసింది. అయితే తన పిల్లకి ఏమైందో అని తల్లికోతి పడిన ఆవేదన ఎలాంటి వారినైనా ఆందోళనకు గురిచేస్తుంది. వెయ్యి మాటల్లో వ్యక్తం చేయలేని భావాన్ని ఒక్క ఫోటోతో చెప్పవచ్చు. మనుషులకైనా, జంతువులకైనా కన్నప్రేమ ఎలా ఉంటుందో ఈ ఒక్క ఫోటో సాక్ష్యం కాదంటారా?