ITEMVIDEOS: భారత క్రికెటర్ల అగ్రహం కట్టలు తెంచుకుంది..

Posted: 04/13/2017 09:58 PM IST

శ్రీనగర్‌లో ఉప ఎన్నికల విధులు నిర్వహించుకుని తిరిగి వస్తున్న సీఆర్‌పిఎఫ్ జవాన్లపై జమ్మూకాశ్మీర్ కు చెందిన కొంతమంది యువత దాడి చేయడంపై భారత క్రికెటర్ల అగ్రహం కట్టలు తెంచుకుంది. చేత్తో, కాళ్లతో ఇష్టమొచ్చిన విధంగా తన్నినా, తిట్టినా జవాన్లు మాత్రం ఏమీ స్పందించకుండా అలా నడుచుకుంటూ ముందుకు కదలిన ఘటనలను చూసిన టీమిండియా మాజీ క్రికెటర్ వీరేంద్ర సెహ్వాగ్, క్రికెటర్ గౌతమ్ గంభీర్ లు తీవ్రస్థాయిలో మండిపడ్డారు.

సోషల్ మీడియాలో విపరీతంగా వైరల్ అయ్యిన ఈ వీడియోను చూసి చలించిపోయిన క్రికెటర్లు.. ఎవరైతే సరిహద్దులో కఠోరమైన పరిస్థితుల నడుమ విధులు నిర్వహిస్తూ.. దేశ పౌరులు హాయిగా నిద్రించడానికి  కారణమవుతున్నారో.. ఎవరిని చూసి శత్రుసేనలు, శత్రుదేశాల ఉగ్రవాదులు దేశంలోకి చోచ్చుకోచ్చేందుకు జంకుతున్నారో వారినా మీరు అవమానించేది.. అంటూ తీవ్రస్థాయిలో ధ్వజమెత్తారు. టీమిండియా వెటరన్ క్రికెటర్ వీరేంద్ర సెహ్వాగ్ ట్విట్టర్‌లో ఆగ్రహం వ్యక్తం చేశాడు. జవాన్లపై దాడిని ఖండించాడు. ఆ వీడియోను పోస్ట్ చేసి, ఇది ఏమాత్రం సమ్మతం కాదని, మన సీఆర్‌పిఎఫ్ జవాన్లకు ఇలా జరగకూడదని అన్నాడు. ఈ అల్లరి మూకను అడ్డుకోవాలని చెప్పాడు.

ఇదే అంశంపై స్పందించిన క్రికెటర్ గంభీర్.. భద్రతాదళాలపై చేయిచేసుకోవటం, రాళ్ల విసరటంపై ఘాటుగా విమర్శలు చేశాడు. ఈ మేరకు తన ట్విట్టర్ ద్వారా సంచలన ట్విట్స్ తో రియాక్ట్ అయ్యిన గంభీర్.. జవానుపై పడిన ప్రతి దెబ్బకు.. వంద మంది జీహాదీల ప్రాణం తీస్తుంది అని కామెంట్ చేశాడు. ఆజాదీ కావాలన్న వాళ్ళు ఇప్పుడే భారత్ నుంచి వెళ్ళిపోవాలనీ.. కాశ్మీర్ మాదే అంటూ తన ఆవేశాన్ని వ్యక్తం చేశాడు. దేశ జెండాలోని కాషాయ రంగు మన కోపంలోని కసిని.. తెలుపు రంగు జీహాదీల శవాలపై కప్పే గుడ్డ అని.. ఆకుపచ్చ రంగు టెర్రరిజంపై ఉన్న ద్వేశాన్ని తెలియచేస్తాయని చాలా ఘాటుగా తన ట్విట్స్ చేశాడు.