సంచలనంగా మారిన మరో జవాన్ ఉదంతం

Posted: 02/03/2017 08:38 AM IST

Jawan treks through snow with mom s dead body

వంద కోట్ల భారతీయుల రక్షణ కోసం సరిహద్దులో పహారా కాస్తున్న జవాన్ల దీన స్థితిని వివరిస్తూ సత్కారంగా తమకు ఎంతటి చెత్త తిండి పెడుతున్నారని చెబుతూ ఓ వీడియోను పోస్ట్ చేసిన జవాన్ గుర్తున్నాడా? ప్రస్తుతం ఆ తేజ్ బహదూర్ పరిస్థితి దారుణంగా మారిందని ఆయన భార్య షర్మిల యాదవ్ ఆరోపిస్తోంది. తన భర్తను అధికారులు అరెస్ట్ చేసి.. చిత్ర హింసలకు గురి చేస్తున్నారని.. ఆ విషయాన్ని భర్తే తనకు ఫోన్ చేసినట్లు చెప్పినట్లుగా చెబుతోంది ఆమె. ఓ పక్కన ఇలాంటి ఆరోపణలు వినిపిస్తున్న క్రమంలో మరో ఉదంతం గుండెను కదిలించి వేస్తోంది.

కశ్మీర్ కుప్వారా జిల్లా కర్ణ ప్రాంతానికి చెందిన మహ్మద్ అబ్బాస్ పఠాన్ కోట్ ఎయిర్ బేస్ లో జ‌వానుగా విధులు నిర్వ‌ర్తిస్తున్నాడు. 60 ఏళ్ల తల్లి షేకీనా బేగం అతనితోనే ఉంటోంది. గత ఐదు రోజుల క్రితం తీవ్ర గుండెపోటుతో ఆమె మృతి చెందింది. త‌న త‌ల్లి మృతదేహానికి అంత్యక్రియలు స్వగ్రామంలోనే చేయాలని భావించాడు. అందుకోసం కశ్మీర్‌కు తన తల్లి మృతదేహంతో చేరుకున్నాడు. ఆ స‌మ‌యంలో 50 కిలోమీటర్ల దూరం వెళ్లాల్సి ఉండగా దారి మధ్యలో ఓ భారీ మంచుకొండ చరియ విరిగి పడడంతో స్పందించిన అధికారులు ఆ జవానుకు హెలికాప్టర్ ద్వారా సాయం చేస్తామ‌ని అన్నారు. త‌న‌ తల్లి మృత‌దేహాన్ని అక్కడే ఉంచి హెలికాప్టర్‌ కోసం ఎదురు చూసిన జ‌వానుకు నిరాశే మిగిలింది. నాలుగు రోజులుగా హెలికాఫ్ట‌ర్ రాలేదు.

ఎంత‌కీ హెలికాప్టర్ రాక‌పోవ‌డంతో బంధువులు వారిస్తున్నా వినకుండా తల్లి మృతదేహాన్ని తన భుజాన వేసుకొని అబ్బాస్ సుమారు ఆరు మీటర్ల మేర పేరుకుపోయిన మంచులో నుంచి పది గంటలపాటు న‌డిచాడు. ఆయ‌న‌కు మరికొంతమంది సాయం చేశారు. ఇది త‌న‌కు జ‌రిగిన పెద్ద అవమానమ‌ని, త‌న‌ తల్లికి గౌరవ ప్రదంగా అంత్యక్రియలు చేయలేకపోయానని ఆ జ‌వాను ఆవేద‌న వ్య‌క్తం చేశాడు. త‌మ అధికారులు త‌న‌కు సాయం చేయ‌డానికి హెలికాప్టర్‌ పంపిస్తామని చెప్పి ఎంత‌కూ పంపించ‌లేద‌ని అన్నాడు. తాను మంచుముక్కలపై ప్రమాదకర స్థితిలో నడుచుకుంటూ త‌న‌ తల్లి మృతదేహాన్ని భుజాన వేసుకొని తీసుకెళ్లానని చెప్పాడు.

పక్కన తల్లి శవాన్ని పెట్టుకుని నాలుగు రోజుల పాటు ఎదురుచూసినా ఎవరూ పట్టించుకోలేదని వాపోయాడు. అంతేగాక, ఈ రోజు త‌న‌ ఫోన్‌ కూడా కట్‌ చేశారని ఆయ‌న చెప్పాడు. అందుకే తాను త‌న త‌ల్లిని భుజంపై మోసుకెళ్లాల్సి వ‌చ్చింద‌ని అన్నారు. మ‌రోవైపు ఈ ఘ‌ట‌న‌పై అధికారులు స్పందిస్తూ తాము ఈ రోజే హెలికాప్టర్‌ సిద్ధం చేశామని అన్నారు. అయితే, హెలికాప్టర్‌ దిగే చోటులేకపోవడంతో వారే వద్దన్నారని అంటున్నారు. తమ ప్రాణాలను లెక్కచేయకుండా పోరాడే యోధులకు ఇలాంటి అవమానాలేంటంటూ ప్రస్తుతం ఈ విషయంపై సోషల్ మీడియాలో తీవ్ర చర్చ నడుస్తోంది.