అదసలు సెల్ఫీ మరణమా? కాదా?

Posted: 01/17/2017 08:52 AM IST

Teen slips taking selfie on europe tallest building

రష్యాలో ఓ యువకుడి అనుమానాస్పదన మృతి సంచలనంగా మారింది. 86 అంత‌స్తుల భ‌వ‌నంపై నుంచి కింద‌కు దూకి ప్రాణాలు కోల్పోయిన ఘ‌ట‌న లో పోలీసులు తలలు పట్టుకుంటున్నారు. ర‌ష్యాలోని పెద్దదైన టవర్లలో ఒకటైన మాస్కో ఓకో టవర్ వ‌ద్ద‌ ఈ ఘటన చోటుచేసుకుంది.

మూడు రోజుల క్రితం ఆ యువ‌కుడు కింద పడి మరణించాడు. ఆ ట‌వ‌ర్‌ ఎత్తు సుమారు 1,162 అడుగులు ఉంటుంది, యూరప్ లోనే అతిఎత్తైనదిగా దీనికి పేరుంది. పలు వ్యాపార, వాణిజ్య సంస్థలు కూడా ఉన్న ఈ ట‌వ‌ర్ ఎల్ల‌ప్పుడూ ర‌ద్దీగా క‌న‌ప‌డుతుంది. అయితే సెల్ఫీ దిగే ప్ర‌య‌త్నంలోనే కింద‌కు ప‌డిపోయాడ‌ని కొంద‌రు చెబుతున్నారు. అయితే, తండ్రితో గొడవ ప‌డి ఆత్మ‌హ‌త్య చేసుకున్నాడ‌ని కూడా మ‌రి కొంద‌రి వాద‌న‌.

18 ఏళ్ల అలెగ్జాండర్ అనే ఈ యువకుడు ఒక్క‌సారిగా ఓకో టవర్‌ పైనుంచి పార్కింగ్‌లో ఉన్న ఓ మెర్కిడిస్ బెంజ్ కారుపై పడి ప్రాణాలు కోల్పోయాడు. రష్యాలోని కొన్ని వార్తాపత్రికలు మాత్రం ఈ న్యూస్‌ని ప్రచురిస్తూ... ఆ యువ‌కుడు త‌న‌ తండ్రితో కలిసి స్కేటింగ్‌ చేసేందుకు ఓకో టవర్‌కి వచ్చాడని, అదే స‌మ‌యంలో త‌న తండ్రితో గొడ‌వ‌కు దిగి మనస్తాపానికి గురై కిందకి దూకి మృతి చెందాడ‌ని పేర్కొన్నాయి. మ‌రి కొంద‌రు మాత్రం ట‌వ‌ర్‌పై సెల్ఫీ దిగేందుకు ఆ యువ‌కుడు చేసిన ప్రయత్నమే కార‌ణ‌మ‌ని చెబుతున్నారు. ఏది ఏమైనా అతని తండ్రి తీవ్ర షాక్ లో కోమాలో ఉండటంతో, టవర్ పై భాగంలో కెమెరాలు లేకపోవటంతో ఈ కేసు మిస్టరీ చేధించేందుకు పోలీసులు తీవ్రంగా యత్నిస్తున్నారు.