చర్చి కూలి, పేలి 185 మంది దుర్మరణం

Posted: 12/12/2016 08:26 AM IST

185 died in nigerian church collapses and cairo church blast

క్రిస్మస్ వేడుకలు ఓవైపు ప్రపంచవ్యాప్తంగా అట్టహాసంగా జరుగుతుంటే ఆ రెండు దేశాల్లో మాత్రం తీవ్ర విషాదాన్ని నింపాయి. నైజీరియాలో చర్చి పైకప్పు కూలి 160 మంది మృత్యువాత పడగా, ఈజిప్ట్ లో ఓ చర్చి వద్ద పేలుడు జరిగి 25 మంది చనిపోయారు.

ఈజిప్టు రాజధాని కైరోలో చర్చి వద్ద బాంబు పేలిన సంఘటనలో 25 మంది మృతి చెందగా, 35 మంది గాయపడ్డారు. చర్చి ఆవరణలో అమర్చిన బాంబును పేల్చి ఈ దారుణానికి పాల్పడ్డారని కొందరు ప్రత్యక్షసాక్షులు చెప్పారు. బాంబు పేలుడు అనంతరం, రక్తసిక్తంగా మారిన ఈ ప్రాంతంలో మృతదేహాలు చెల్లాచెదురుగా పడి ఉన్నాయి. మృతుల్లో మహిళలు కూడా ఉన్నారు. ఈ సంఘటనకు ఎవరు బాధ్యులనే విషయం ఇంకా తెలియలేదు.

Egypt Church Blast

పైకప్పు కూలి సమాధి...
ఆగ్నేయ నైజీరియాలోని ఉయో ప్రాంతంలో విషాదం చోటు చేసుకుంది. ఆదివారం ప్రార్థనల సమయంలో ఓ చర్చి పై కప్పు ఒక్కసారిగా కూలిపోవడంతో 160 మంది ప్రాణాలు శిథిలాల కింద సమాధి అయ్యాయి. తొలుత సహాయక సిబ్బంది 60 మృతదేహాలను వెలికి తీయగా ఆపై ఆ లెక్క 160కి చేరింది. ప్రమాదంలో చనిపోయిన వారి సంఖ్యను వైద్యులు అధికారికంగా ప్రకటించారు. ప్రమాదం జరిగిన సమయంలో చర్చిలో వందల సంఖ్యలో ప్రజలు ఉన్నట్టు తెలుస్తోంది. నిర్మాణ దశలో ఉన్న ఈ చర్చిని ప్రత్యేక ప్రార్థనల కోసమని వేగంగా ముగించేసినట్టు సమాచారం.

కాగా, భద్రతా ప్రమాణాలను గాలికొదిలేశారా అన్న విషయమై దర్యాప్తు చేస్తామని రాష్ట్ర గవర్నర్ ఉదోమ్ ఎమాన్యుయేల్ ప్రకటించారు. ఈ దుర్ఘటన పట్ల దేశాధ్యక్షుడు ముహమ్మద్ బుహారి విచారం వ్యక్తం చేశారు. గతంలో 2014 లాగోస్‌లోని సినగోగ్ చర్చికి చెందిన బహుళ అంతస్తుల అతిథి గృహం కూలిపోవడంతో 116 మంది చనిపోయిన ఘటన తెలిసిందే.