వహ్ వా..! ప్రహాల్లాదుడు గారు.. ఏమి చెప్తిరి.. ఏమి చెప్తిరి..

Posted: 11/26/2016 02:52 PM IST

తమ ప్రభుత్వం ఒక్క దెబ్బతో దేశం నుంచి అవినీతిని, నల్లధనాన్ని, ఉగ్రవాదాన్ని, అంతర్గత తీవ్రవాదాన్ని అణిచివేసేందుకు చర్యలు తీసుకుందని దీంతో ఇక దేశం డిజిటల్ క్యాష్ దిశగా పయనిస్తుందని, ఇది క్యాష్ లెస్ ఎకానమికి దోహదపడి త్వరలోనే అ ఫలితాలను అందుకున్న తొలి దేశంగా కూడా నిలుస్లుందని ఓ వైపు కేంద్రం ప్రభుత్వంలోని పెద్దలు ప్రకటనలు గుప్పిస్తున్నారు. ఈ తరుణంలో తాము కష్టపడి, రెక్కలు ముక్కలు చేసుకుని కష్టపడిన డబ్బును పొందేందుకు అవస్థలు పడుతున్నామని దేశంలోని ప్రజలు నిరసనలు వ్యక్తం చేస్తున్నా వాటిని కనీసం పరిగణలోకి కూడా తీసుకోవడం లేదని విమర్శలు వినిపిస్తున్నాయి.

కేంద్రంతో ఏ సంబంధం లేని, కనీసం ప్రభుత్వాంలో పరోక్ష సంబంధం కూడా లేని వ్యక్తులకు, బడా బిజినెస్ మెన్లకు, బీజేపి స్పాన్సర్లకు ముందుకుగానే లీకులు ఇచ్చారన అరోపణలు వస్తున్నా.. ఇప్పటి వరకు కేంద్రం ప్రభుత్వంలోని ఏ ఒక్కరైనా ఆ ఆరోపణలపై స్పందించారా..? అంటే లేదు అన్న సమాధానమే వస్తుంది. బాబా రాందేవ్ వద్దని అంటే పది వేల నోటు ముద్రణను ప్రభుత్వం రద్దు చేసుకుందంటే.. కేంద్రంలో వున్నది ప్రజా ప్రభుత్వమా..? లేక సన్యాసులు, సంపన్నులు, పారిశ్రామిక వేత్తల, బడాబాబుల ప్రభుత్వమా..? అన్న విమర్శలు కూడా వినిపిస్తున్నాయి.

ఈ తరుణంలో హైదరాబాద్ పర్యటనకు వచ్చిన ప్రధాని నరేంద్రమోడీ తమ్ముడు ప్రహల్లాద్ మోడీ తన అన్న ప్రభుత్వం పట్ల ప్రహ్లాద భక్తిని చాటుకున్నారు. విమర్శలు విని విని అలవాటు అయినట్లుంది కాబోలు.. అసలు వాటి జోలికే వెల్లకుండా.. మోడీ ప్రభుత్వం తీసుకున్న పెద్ద నోట్ల రద్దు నిర్ణయాన్ని స్వాగతించారు. ఇంతవరకు బాగానే వున్నా అయన స్వాగతించిన తీరు చూసి హైదరాబాద్ వాసులు కంగుతిన్నారు. హైదరాబాద్ ప్రజలపై  న‌గ‌దు కొర‌త ఉన్న‌ట్లు త‌న‌కు అనిపించ‌డం లేద‌ని వ్యాఖ్యానించారు.

న‌గ‌రంలో జ‌రుగుతున్న ఓ కార్యక్రమంలో పాల్గొనేందుకు వచ్చిన ఆయన ఇవాళ ఉద‌యం మీడియాతో మాట్లాడుతూ.. న‌గ‌రంలో ఎక్కడా న‌గ‌దు సమస్య ఉన్నట్లు లేదని, ఎవరి ముఖాలు చూసినా ఎంతో ఆనందంగా ఉన్న‌ట్లు కనపడుతున్నారని, దీనిని బ‌ట్టే తాను ఇలా అనుకుంటున్నాన‌ని పేర్కొన్నారు. అయితే ఆయన దారిలో మూసివున్న ఏటీయం కేంద్రాలు, ఇవాళ తెరుచుకోని బ్యాంకులు గురించి తెలియదు కాబోలు అందుకనే అలా స్టేట్ మెంట్ ఇచ్చారని పురజనులు వ్యాఖ్యానిస్తున్నారు.