ట్రంప్ తో జాగ్రత్తా.. ఎన్నికల వేళ హిల్లరీ సంచలన వ్యాఖ్యలు

Posted: 10/30/2016 08:43 AM IST

Hillary clinton leads donald trump by tight two point margin in latest tracking poll

ఎన్నికలకు మరో తొమ్మిది రోజులే వున్న వేళ.. అమెరికా డెమొక్రటిక్ పార్టీ అధ్యక్ష అభ్యర్థి హిల్లరీ క్లింటన్ సంచలన వ్యాఖ్యలు చేశారు. ప్లోరిడాలోని ఓ సమావేశంలో మాట్లాడిన హిల్లరీ అటు ఎఫ్ బి ఐ తో పాటు ఇటు డోనాల్డ్ ట్రంప్ విషయంలోనూ జాగ్రత్తగా వుండాలని కోరారు. తన పాత ఈ-మెయిల్స్ పై ఎఫ్బీఐ అధికారులు మరోమారు విచారణ జరుపుతామని చెప్పడాన్ని తాను ఊహించలేదని, అధికారుల నిర్ణయం తనను కష్టపెడుతోందని హిల్లరీ వ్యాఖ్యానించారు.

ఎన్నికల ముందు, ఓ చిన్న సమాచారాన్ని పట్టుకుని తిరిగి విచారణకు నిర్ణయించడం తనను ఆశ్చర్యపరిచిందని హిల్లరీ తెలిపారు. కాగా ఇదే సమయంలో అమె తన మద్దతుదారులకు ఎన్నికలలో అప్రమత్తంగా వుండాలని కోరారు. వివిధ రకాల సర్వేలు తానే ఆధిక్యంలో ఉన్నట్టు చెబుతున్న వేళ అమె కీలక వ్యాఖ్యలు చేశారు. డొనాల్డ్ ట్రంప్ పై తనకు ఆధిక్యం కనిపిస్తున్నా, అలసత్వం పనికిరాదని తన మద్దతుదారులను ఆమె హెచ్చరించారు.

ట్రంప్ కు కూడా ఇంకా గెలిచే అవకాశాలు ఉన్నాయని, మరో పది రోజుల పాటు ప్రజల్లోనే ఉండి ప్రచారం నిర్వహించాలని, ఏ క్షణాన్నీ వదిలి పెట్టరాదని ఆమె అన్నారు. కాగా, తాజాగా ఈ-మెయిల్ స్కాములో ఎఫ్బీఐ మరోసారి విచారణ మొదలు పెట్టడంతో అది హిల్లరీకి ఎదురు దెబ్బ అవుతుందేమోనని ఆమె ప్రచార కమిటీ ఆందోళన వ్యక్తం చేస్తోంది కాగా, నవంబర్ 8న ఓటింగ్ జరగనుండగా, హిల్లరీకే గెలుపు అవకాశాలు అధికంగా ఉన్నాయని పలు సర్వేలు వెల్లడించిన సంగతి తెలిసిందే.