పురాణంపై జోక్ చేసిన ఫోటోతో సంబంధం లేదంట

Posted: 08/26/2016 06:21 PM IST

ఫ్యాషన్ పోర్టల్ మింత్రా నుంచి వచ్చిన ఓ యాడ్ పై ఇప్పుడు తీవ్ర స్థాయిలో విమర్శలు వచ్చి పడుతున్నాయి. మహాభారతంలోని ద్రౌపది వస్త్రాపహరణం సన్నివేశంకు సంబంధించిన ఫోటోను తమ ఈ కామర్స్ పోర్టల్ ప్రచారానికి వాడుకున్నారని, పురాణాలను హేళన చేస్తున్న మింత్రాను వెంటనే బ్యాన్ చేయాలన్న ఓ సందేశం ఇప్పుడు ట్విట్టర్ లో చక్కర్లు కొడుతోంది.

కృష్ణాష్టమీ సందర్భంగా రిలీజైన ఆ ఫోటో లో ఇంతకీ ఏముందంటే... దుశ్శాసనుడు ఓవైపు ద్రౌపది చీర లాగుతుంటాడు. ఇంతలో ఆమెను రక్షించేందుకు కృష్ణుడు మింత్రాలో చీరలు ఆర్డర్ ఇచ్చినట్లు అందులో ఉంది. దీనిపై నెటిజన్లు తీవ్ర స్థాయిలో మండిపడుతున్నారు. #boycottmyntra పేరుతో చేసిన ట్యాగ్ ఇప్పుడు వైరల్ గా మారిపోయింది. అయితే ఆ ఫోటోని తాము పెట్టలేదంటూ మింత్రా ప్రకటించింది.

ఆ ఫోటో చేయించింది మేము కాదు, అసలు ప్రచారం కోసం మేము దానిని వాడలేదు అంటూ ఓ సందేశాన్ని తమ అఫీషియల్ ట్విట్టర్ లో ట్వీట్ చేసింది. అయినప్పటికీ మింత్రాపై విమర్శలు వెల్లువలా వస్తూనే ఉన్నాయి. గతంలో డోర్ మ్యాట్ లపై దేవుడి చిత్రాలను వేసి ఈ కామర్స్ దిగ్గజం అమెజాన్, మరో ఉదంతంలో స్నాప్ డీల్ ఇలానే వ్యవహరించి విమర్శలు ఎదుర్కున్న సంగతి తెలిసిందే.