క్రోకడైల్ కిల్లర్ ‘మచిలీ’ కన్నుమూత

Posted: 08/19/2016 12:27 PM IST

ప్రపంచంలో అత్యంత వృద్ధ పులి, మొసళ్లను సైతం మట్టుపెట్టగల మచిలీ గురువారం కన్నుమూసింది. రాజస్థాన్ లోని రణతంబోర్ జాతీయ పార్క్ లో తుది శ్వాస విడిచినట్లు నిర్వాహకులు తెలిపారు. క్వీన్ ఆఫ్ రణతంబోర్ గా గుర్తింపు పొందిన మచిలీ ఎక్కువ సంవత్సరాలు బతికి రికార్డు సృష్టించింది. సాధారణంగా పులుల జీవిత కాలం 10-15 మధ్య ఉంటుంది.

కానీ, మచిలీ మాత్రం 20 సంవత్సరాలు బతకటం విశేషం. ఇక వయసు పైబడటంతో అనారోగ్యంతో కొంత కాలంగా ఇది బాధపడుతోంది. కోరదంతాలు కోల్పోవటంతో వేటలో ఇబ్బందులు ఎదుర్కుంటూ సరిగ్గా ఆహారం తీసుకోలేకపోతుంది. మచిలీ మరణించిన విషయాన్ని రాజస్థాన్ ముఖ్యమంత్రి వసుంధరా రాజే ట్విట్టర్ ద్వారా తెలిపారు.

లేడీ ఆఫ్ ద లేక్స్, క్రోకడైల్ కిల్లర్.. తదితర ముద్దు పేర్లతో పిలుచుకునే మచిలీ కోసం ప్రత్యేకంగా టూరిస్ట్ లు విచ్చేస్తుంటారు. 2012లో బీబీసీ మచిలీ పై స్పెషల్ డాక్యుమెంటరీ రూపొందించింది కూడా. ప్రపంచంలో ఎక్కువ ఫోటోలు తీయించుకున్న వ్యాఘ్రంగా మచిలీ రికార్డులోకి ఎక్కింది.