ముద్రగడ ఈ స్వీట్లు పంచడం దేనికి?

Posted: 06/28/2016 09:39 AM IST

కాపు ఉద్యమ నేత ముద్రగడ పద్మనాభం ఆరోగ్యం కాస్త కోలుకుంది. పూర్తిగా స్థిమిత పడ్డాక త్వరలో కార్యాచరణ ప్రకటిస్తానని ఇదివరకే చెప్పిన ఆయన ప్రభుత్వానిక డెడ్ లైన్ కూడా విధించారు. కాపు రిజర్వేషన్లపై సానుకూల స్పందన రాకపోతే ఇక ఆమరణ దీక్షలు ఉండబోవని, ప్రజా పోరాటం తప్పదని హెచ్చరించారు. ఇక 14 రోజులు ఆమరణ దీక్ష అనంతరం ఆరోగ్యం కుదుటపడటంతో రాజమహేంద్రవరంకు వెళ్లారు. ఆమరణ దీక్ష సందర్భంగా తనకు చికిత్సలు అందించిన వైద్యులు, రాజమహేంద్రవరం ఆసుపత్రి వైద్య సిబ్బందిని పేరు పేరునా పలకరించారు.

కేవలం వారిని కిలిసేందుకే ప్రత్యేకంగా ఆయన అక్కడికి వెళ్లారంట. ఆయన అక్కడి ప్రభుత్వ ఆసుపత్రి సూపరింటెండెంట్ తో ప్రత్యేకంగా భేటీ అయ్యారు. దీక్ష సందర్భంగా తనకు మెరుగైన చికిత్స అందించిన మీ సేవలను మరువలేనంటూ ఆయన సూపరింటెండెంట్ కు చెప్పారు.

అంతేకాకుండా తన వెంట స్వీట్ పాకెట్లు పట్టుకుని మరీ వెళ్లిన ఆయన అక్కడి వైద్యులు, వైద్య సిబ్బందితో పాటు పారిశుద్ధ్య కార్మికులకు కూడా వాటిని అందజేశారు. ఇక ఆసుపత్రిని క్లీన్ గా ఉంచుతున్న శానిటేషన్ సిబ్బందికి ఆయన స్వీటు బాక్సులతో పాటు రూ.3 వేలను అందజేశారు. అంతేకాకుండా అంతా కలిసి ఓ మారు తన ఇంటికి భోజనానికి రావాలని కూడా ఆయన వారికి ఆహ్వానం పలికారు.