కేసీఆర్ రికార్డు చిరిగి చిరిగి చంపుతోంది

Posted: 06/16/2016 02:06 PM IST

దేశంలోకెల్లా అతిపెద్ద జెండాను ఆవిష్కరించాలన్న కలను తెలంగాణ ఆవిర్భావ దినోత్సవం సందర్భంగా సాకారం చేశారు సీఎం కేసీఆర్. ట్యాంక్ బండ్ పరిసర ప్రాంతంలోని సంజీవయ్య పార్క్ లో 303 అడుగుల ఎత్తైన ధ్వజస్థంభంపై దీని ఎగరవేశారు. 108 అడుగుల ఎత్తు, 72 అడుగుల వెడల్పుతో దేశంలో కెల్లా భారీ జాతీయ జెండాగా ఇది రికార్డులోకి ఎక్కింది. అయితే 78 కిలోల బరువున్న ఈ రికార్డు జెండా ఇప్పుడు అధికారులకు తలపోటుగా తయారయ్యింది.

ఈ మధ్య వీస్తున్న బలమైన గాలులకు ఇప్పటికే ఆ జెండా మూడుసార్లు చిరిగిపోయింది. దీంతో దానిని కిందకు దించి రిపేర్లు చేయటం, తిరిగి ఎగురవేయడం పెద్ద సమస్యగా మారుతోంది. ప్రభుత్వ ఆదేశాలతో నిర్వహణ బాధ్యతను నెత్తిన వేసుకున్న హెచ్ఎండీఏకు ఈ వ్యవహారం తలకు మించిన భారంగా పరిణమిస్తోంది. మంగళవారం రాత్రి జెండా మూడోసారి చిరిగిపోగా, నిన్న సాయంత్రం దానికి కుట్లు వేసేందుకు అధికారులు శ్రమించాల్సి వచ్చింది. ఆ తర్వాత తిరిగి ఎగురవేసేందుకు చేసిన యత్నించగా, భారీగా గాలలు వీయటంతో అది సాధ్యం కాలేదు. దీంతో నిన్న పగలంతా జెండా లేకుండానే స్తంభం బోసిగా కనిపించింది. పదిరోజులకే ఇన్నిసార్లు మరమత్తులు చేయాల్సి వస్తే భవిష్యత్తులో ఇంకెలా ఉంటుందో అని అధికారులు దీర్ఘాలు తీస్తున్నారు.

భాస్కర్