జయలలిత, కరుణానిధిల రికార్డులు

Posted: 05/19/2016 04:34 PM IST

తమిళనాడులో జయలలిత వరుసగా రెండో సారి అధిక్యం సాధించిన పార్టీగా చరిత్ర సృష్టించారు. నిజానికి ఇప్పటివరకు ఎంజీ రామచంద్రన్ తర్వాత ఏ ఒక్కరూ రెండోసారి వరుసగా ముఖ్యమంత్రి కాలేదు. 1984 తర్వాత అంటే, 32 ఏళ్ల తర్వాత తమిళనాడులో వరుసగా రెండోసారి ఒక ముఖ్యమంత్రి అధికారం చేపట్టడం ఇదే మొదటిసారి. ఇన్నాళ్లూ ప్రతిసారీ అధికార మార్పిడి జరుగుతూనే వచ్చింది. కానీ ఈసారి మాత్రం జయలలిత రికార్డు సృష్టించి చరిత్ర తిరగరాసింది.

మరోపక్క కరుణానిధి కూడా రికార్డు గెలుపు సాధించారు. డీఎంకే పార్టీ ఓటమి దిశలో పయనిస్తుంటే, ఆ పార్టీ అధ్యక్షుడు కరుణానిధి మాత్రం విజయం సాధించారు. తిరువరూర్ నియోజకవర్గం నుంచి ఆయన ఏకంగా 13వ సారి విజయం సాధించారు. ఇప్పటివరకూ కరుణానిధి ఇప్పటివరకూ పోటీ చేసిన అన్ని అసెంబ్లీ ఎన్నికల్లోనూ గెలుపొంది రికార్డు సృష్టించారు. కాగా అన్నాడీఎంకే ఆధిక్యంలో దూసుకుపోతోంది. ఏది ఏమైనా పార్టీని నడిపించడంతో విఫలమైన కరుణానిధి మాత్రం గెలిచి.. ఓడిపోయారు.