మరోసారి అట్టుడికిన ఉస్మానియా యూనివర్సిటీ

Posted: 02/27/2016 01:38 PM IST

తెలంగాణలో అతి కీలకమైన ఉస్మానియా యూనివర్సిటీ మరోసారి భగ్గుమంది. తెలంగాణ ప్రభుత్వానికి వ్యతిరేకంగా వందల మంది విద్యార్థులు తీసని ర్యాలీతో ఉద్రిక్త వాతావరణం నెలకొంది. నిన్న తెలంగాణ సిఎం కేసీఆర్ కాంట్రాక్ట్ ఉద్యోగులకు గ్రూప్ 2లాంటి పరీక్షల్లో వెయిటేజీ కల్పించడం మీద చేస్తున్న చర్యలకు నిరసనగా వారు తమ గళాన్ని వినిపించారు. కాంట్రాక్ట్ ఉద్యోగులను రెగ్యులరైజ్ చెయ్యడం వల్ల తాము నష్టపోతామని ఈ సందర్భంగా విద్యార్థులు నినదించారు. మరి కొద్ది రోజుల్లో నిర్వహించనున్న గ్రూప్ 2, ఎస్సై పరీక్షల మీద కూడా వారు నిరసన తెలిపారు. కాగా ఉస్మానియా యూనివర్సిటీ దగ్గరకు పోలీసులు చేరుకోవడంతో వాతావరణం వేడెక్కింది.

కాగా గత గ్రూప్ పరీక్షా విధానంలో కాకుండా కాంట్రాక్ట్ ఉద్యోగులకు వెయిటేజ్ ఇవ్వాలని వినిపిస్తున్న ప్రతిపాదనల మీద ఉస్మానియా యూనివర్సిటీ విద్యార్థులు ఆగ్రహం వ్యక్తం చేశారు. గ్రూప్ 2, ఎస్సై పరీక్షలను పాత పద్దతిలోనే నిర్వహించాలని వారు డిమాండ్ చేశారు. కాగా విద్యార్థులకు ర్యాలీ నేపథ్యంలో పోలీసులు అలర్ట్ అయ్యారు. పోలీసులు భారీగా అక్కడికి చేరుకోవడంతో పరిస్థితి కాస్త వేడెక్కింది. ర్యాలీని అడ్డుకున్న పోలీసులు కొంత మంది విద్యార్థి నాయకులను కూడా అరెస్టు చేయడం జరిగింది.