టిడిపిలోకి భూమా..?! కర్నూల్ లో రాజకీయ వేడి

Posted: 02/19/2016 03:19 PM IST

భూమా నాగిరెడ్డి తెలుగుదేశం పార్టీలోకి చేరుతున్నట్లు ఓ వార్త కర్నూల్ జిల్లాలో చర్చనీయాంశంగా మారింది. గతంలో తెలుగుదేశం పార్టీలోనే ఉన్న భూమా నాగిరెడ్డి తర్వాత చిరంజీవి ప్రజారాజ్యంలో చేరారు. ప్రస్తుతం జగన్ స్థాపించిన వైఎస్ఆర్ కాంగ్రెస్ పార్టీలో కొనసాగుతున్నారు. కాగా  వైసీపీ కీలక నేత, జగన్‌కు వెన్నంటి ఉన్న భూమా నాగిరెడ్డి కుటుంబం టీడీపీలో చేరుతున్నట్లు వార్తలు షికారు చేస్తున్నాయి. మరికాసేపట్లో వైసీపీకి భూమా కుటుంబం షాక్ ఇవ్వనుందని పుకార్లు వినిపిస్తున్నాయి. భూమా ఫ్యామిలీతో పాటు మరో ఇద్దరు వైసీపీ ఎమ్మెల్యేలు సైకిల్ ఎక్కబోతున్నారని ఊహాగానాలు వెలువెత్తుతున్నాయి. భూమా నాగిరెడ్డి పీఎసీ చైర్మన్‌గా, కుమార్తె అఖిలప్రియ ఎమ్మెల్యేగా కొనసాగుతున్నారు. అయితే పార్టీ మారుతున్నట్లు భూమా తన అనుచరులతో చెప్పినట్లు వార్తలు వినిపిస్తున్నాయి. టీడీపీలో చేరితే మంత్రి పదవి వస్తుందని కూడా అనుచరులకు భూమా చెప్పినట్లు వినికిడి.

భూమా నాగిరెడ్డి, ఆయన కూతురు అఖిల ప్రియ తెలుగుదేశం పార్టీలో చేరితే ఓ మంత్రి పదవిని చంద్రబాబు ఇస్తారని తెలుస్తోంది. ఇందుకు సంబంధించి చర్చలు కూడా జరిగాయని అంటున్నారు. నంద్యాల, ఆళ్లగడ్డలు పూర్తిగా వెనుకబడ్డాయని, వాటి అభివృద్ధి కోసం అధికార పార్టీలో చేరందుకు మొగ్గు చూపుతున్నారట. భూమాకు కర్నూలు జిల్లాలో మంచి బలగం ఉంది. ఈ నేపథ్యంలో భూమాతో పాటు మరో ఇద్దరు ఎమ్మెల్యేలు కూడా టిడిపిలో చేరుతారనే ఊహాగానాలు వినిపిస్తున్నాయి. ఈ రోజు సాయంత్రం కార్యకర్తలతో భేటీ అనంతరం చేరుతారా లేదా తెలియనుంది.