నలుగురు ఉగ్రవాదులను పట్టుకున్న తెలంగాణ పోలీసులు

Posted: 02/17/2016 02:54 PM IST

ఒడిశాలో తలదాచుకున్న నలుగురు సిమి ఉగ్రవాదులను నల్గొండ పోలీసులు అరెస్టు చేశారు. రావూర్ ఖిలా కురేచిలో ఉగ్రవాదులు ఉంటున్న ఇంటిపై అర్ధరాత్రి ఒడిశా పోలీసుల సహకారంతో నల్గొండ పోలీసులు దాడి చేశారు. సుమారు 3 గంటల పాటు ఇరు వర్గాల మధ్య ఎదురుకాల్పులు జరిగాయి. కాల్పుల అనంతరం ఎట్టకేలకు నలుగురు నిందితులను పోలీసులు అదుపులోకి తీసుకున్నారు. వారి నుంచి 5 పిస్టళ్లు, బుల్లెట్లు, ఇతర సామగ్రి స్వాధీనం చేసుకున్నారు. పట్టుబడిన వారు 2013లో మధ్యప్రదేశ్‌ లోని ఖాండ్వా జైలు నుంచి తప్పించుకున్న సిమి ఉగ్రవాదులుగా గుర్తించారు.

ఖాండ్వా జైలు నుంచి ఆరుగురు ఉగ్రవాదులు తప్పించుకోగా, గత సంవత్సరం ఏప్రిల్‌-లో నల్గొండ జిల్లాలో పోలీసుల ఎదురుకాల్పుల్లో ఉగ్రవాదులు ఎజాద్‌, అస్లామ్‌ హతమయ్యారు. మిగిలిన అబూ ఫైజల్‌, మహబూబ్‌, అంజాద్‌, జకీర్‌-లు ఎట్టకేలకు పోలీసులకు చిక్కారు. నలుగురు ఉగ్రవాదులను అరెస్టు చేసినట్లు ఒడిశా డీజీపీ కేబీసింగ్‌ ప్రకటించారు. కాగా తెలంగాణ, ఒడిశా పోలీసులు కలిసి కట్టుగా నిర్వహించిన ఆపరేషన్ లో ఉగ్రవాదులను పోలీసులు పట్టుకున్నారు.