కేజ్రీవాల్ పై ఇంక్ దాడికి యత్నం..!

Posted: 01/17/2016 07:26 PM IST

దిల్లీ ముఖ్యమంత్రికి మరోసారి పరాభవం ఎదురైంది. గతంలో అహ్మదాబాద్ లో బిజెపి కార్యకర్తల చేతిలో దాడికి గురై, ఇంకు మొహం మీద పడింది. మరోసారి దిల్లీలో అదే ఛేదు అనుభవం ఎదురైంది. ఆయన ఢిల్లీ ప్రజలకు కృతజ్ఞతలు తెలిపేందుకు నిర్వహిస్తున్న సమావేశంలో ఓ మహిళ ఆయనపై ఇంక్ చల్లే ప్రయత్నం చేసింది. కేజ్రీవాల్ నిల్చున్న వేదిక ఎత్తుగా ఉండడంతో ఆయన పై ఇంక్ పడలేదు. కానీ, సెక్యూరిటీ సీబ్బంది, పోలీసులు ఒక్కసారిగా ఆమెను చుట్టుముట్టి ఇంక్ బాటిల్ గుంజుకున్నారు. పోలీసులు ఆమెను అదుపులోకి తీసుకున్నారు.

మహిళ వేదిక వద్దకు వచ్చి ఇంక్, కొన్నికాగితాలు, ఓ సీడీ కూడా కేజ్రీవాల్ వైపు విసిరే ప్రయత్నం చేసింది. ఢిల్లీలో 15 రోజులపాటు నిర్వహించిన ‘సరి- బేసి’ కార్ల పథకం విజయవంతంగా పూర్తయిన నేపథ్యంలో ఢిల్లీ ప్రజలకు కృతజ్ఞతలు చెప్పేందుకు ఢిల్లీ ఛత్రసాల్ స్టేడియంలో సీఎం అరవింద్ కేజ్రీవాల్ ఈ సమావేశాన్ని ఏర్పాటు చేశారు. దాదాపు ఐదు వేలమంది ఢిల్లీ వాసులు ఆ సమావేశానికి హాజరయ్యారు. ఈ సమావేశంలో మహిళ సీఎంపై ఇంక్ జల్లే ప్రయత్నం చేసింది. ఆమె ఆగ్రహానికి కారణాలేమిటో తెలుసుకునే అవకాశాన్ని పోలీసులు మీడియాకు ఇవ్వకపోవడం విశేషం.