భారీ మావో విగ్రహం నేలమట్టం

Posted: 01/09/2016 09:21 AM IST

చైనాలో ఎంతో అట్టహాసంగా ఏర్పాటు చేసిన కమ్యూనిస్టు పార్టీ వ్యవస్థాపక చైర్మన్ మావో జెడాంగ్ విగ్రహాన్ని అనుమతులు లేవనే కారణంతో అధికారులు కూల్చివేశారు. బంగారు పూతతో ఉన్న 37 మీటర్ల పొడవు ఉన్న భారీ విగ్రహాన్ని 4.6 లక్షల అమెరికా డాలర్ల వ్యయంతో తొంగ్సూ కౌంటీ సమీపంలోని కైఫెంగ్‌లో ఉన్న హెనన్ ప్రావిన్స్‌లో మావో అభిమానులు, పార్టీ కార్యకర్తలు ఏర్పాటు చేసిన సంగతి తెలిసిందే. గతవారం నెలకొల్పిన భారీ విగ్రహం ప్రపంచవ్యాప్తంగా అన్ని మీడియాల్లో పతాక శీర్షికలను ఆకర్షించింది. రిజిస్ట్రేషన్ నమోదు, ఆమోదం లేకపోవడం మావో విగ్రహాన్ని కూల్చివేశామని స్థానిక అధికారులు మీడియాకు వెల్లడించారు.

కార్మికులు, కర్షకులు అందించిన నిధులతో నిర్మించిన తమ అభిమాన నాయకుడు మావో విగ్రహం కూల్చివేయడంపై అభిమానులు, కార్యకర్తలు మండిపడ్డారు. మావో విగ్రహ ఏర్పాటును పార్టీలోని కొంతమంది వ్యతిరేకిస్తున్నారు. మావో పాలనకాలంలో పేదరికం గరిష్ఠస్థాయికి చేరుకొన్నదనే విమర్శలు బలంగా వినిపిస్తున్నాయి. మావో మరణించిన తర్వాత అధికారాన్ని చేపట్టిన డెంగ్ జిన్‌పింగ్ చైనాను ఆర్థిక పరిస్థితి మెరుగుపరిచేలా సంస్కరణలు చేపట్టారనే వాదన వినిపిస్తున్నది. హునన్‌లో నిర్వహించిన మావో 122వ జయంతి ఉత్సవాల్లో ఆయన పాలనపై పార్టీకి చెందిన నేతలు దుమ్మెత్తిపోసిన సంగతి తెలిసిందే.