ప్రమాణస్వీకారానికి మోదీకి.. నితీశ్ అహ్వానం.. డుమ్మా కొట్టనున్న పీఎం

Posted: 11/18/2015 08:36 PM IST

Nitish kumar invites narendra modi for swearing in ceremony

హ్యాట్రిక్ వీరుడిగా పేరుగాంచి, ముచ్చటగా నాల్గవసారి ముఖ్యమంత్రి పగ్గాలు చేపట్టబోతున్న నితీష్ కుమార్ చేస్తున్న ప్రమాణ స్వీకారోత్సవ కార్యక్రమానికి ప్రధాని నరేంద్రమోదీ హాజరుకావడం లేదు. ఈ విషయాన్ని కేంద్ర ప్రభుత్వ వర్గాలు వెల్లడించాయి. తన సీఎం ప్రమాణకార్యక్రమానికి హాజరుకావాల్సిందిగా ఆహ్వానిస్తూ నితిష్ కుమార్ ప్రధాని మోదీకి సందేశం పంపించడంతో.. ముందుగా ఫిక్స్ చేసిన కార్యక్రమాల వల్ల మోదీ కార్యక్రమానికి రాలేకపోవచ్చని ప్రధాని కార్యాలయ వర్గాలు తెలిపాయి.

ఇవాళ స్వయంగా నితీశ్ మోదీకి ఫోన్ చేశారని, ఈ నెల 20న పాట్నాలోని గాంధీ మైదానంలో మధ్యాహ్నం 2 గంటలకు జరిగే ప్రమాణ స్వీకారోత్సవానికి రావాలని ఆహ్వానించారని బీహార్ సీఎం కార్యాలయ అధికారులు తెలిపారు. నాలుగు రోజుల ఛత్ వేడుక ముగియడంతో ఈ ఉదయం పలువురు ప్రముఖులకు నితీశే స్వయంగా ఫోన్ చేసి ఆహ్వానించారని చెప్పారు. అయితే, ప్రధానికి బదులుగా కేంద్ర మంత్రులు వెంకయ్యనాయుడు, రాజీవ్ ప్రతాప్ రూడి ప్రమాణ కార్యక్రమానికి హాజరవుతున్నట్లు తెలిసింది.

కాగా, ఈ కార్యక్రమానికి పలువురు ఎన్డీయే సభ్యులు హాజరుకానున్నట్లు తెలిసింది. పంజాబ్ డిప్యూటీ ముఖ్యమంత్రి సుఖ్ బీర్ బాదల్, శివసేన చీఫ్ ఉద్దవ్ ఠాక్రేల తరుపున సుభాష్ దేశాయ్, రామ్ దాస్ కడం కార్యక్రమానికి హాజరవుతున్నారు. మరోపక్క, ఈ కార్యక్రమానికి ఢిల్లీ ముఖ్యమంత్రి అరవింద్ కే్జ్రీవాల్, బెంగాల్ ముఖ్యమంత్రి మమతా బెనర్జీ, ఉత్తరప్రదేశ్ సీఎం అఖిలేష్ యాదవ్, సమాజ్ వాది పార్టీ చీఫ్ ములాయం సింగ్ యాదవ్ హాజరవుతున్నట్లు స్పష్టం చేశారు.

జి. మనోహర్