అభ్యర్థిని మార్చండంటూ అధిష్టానానికి రాజయ్య వినతి

Posted: 11/04/2015 08:47 AM IST

తన ఇంట్లో అగ్నిప్రమాద ఘటన సంభవించి నలుగురు కుటుంబసభ్యులు సజీవంగా దహనమైన నేపథ్యంలో తాను వరంగల్ ఉప ఎన్నికల బరిలో నిలబడలేనని వరంగల్ ఉప ఎన్నిక కాంగ్రెస్ అభ్యర్థి సిరిసిల్ల రాజయ్య  పార్టీ అధిష్టానాన్ని కోరారు. తన ఇంట్లో అలుముకున్న విషాధఛాయలు తనను కుంగదీసాయని, ఈ పరిస్థితులలో తాను ఎన్నికల్లో పోటీ చేయలేనని, అభ్యర్థిని మార్చాలని రాజయ్య పార్టీ పెద్దలను కోరారు. తనపై నమ్మకంతో టిక్కెట్ ఇచ్చిన పార్టీ అధిష్టానం.. తనను క్షమించండి అంటూ ఆయన కాంగ్రెస్ అధ్యక్షురాలు సోనియాగాంధీని కోరారు.  

రాజయ్య వరంగల్‌ లోకసభ ఉప ఎన్నికలో కాంగ్రెస్‌ అభ్యర్థిగా బరిలోకి దిగిన రాజయ్య నిన్న ఒక సెట్‌ నామినేషన్‌ దాఖలు చేశారు. ఇవాళ మరో సెట్‌ నామినేషన్‌ దాఖలు చేయాల్సి ఉంది.  అగ్నిప్రమాద ఘటన నేపథ్యంలో రాజయ్య తాను పోటీ నుంచి తప్పుకున్నట్లు తెలిపారు. రెండు రోజుల క్రితమే ఆయన డమ్మి నామినేషన్ పత్రాలు దాఖలు చేశారు. రాజయ్య వినతి మేరకు కాంగ్రెస్ హైకమాండ్ కూడా అభ్యర్థిని మార్చే యోచనలో వున్నట్లు సమాచారం. అభ్యర్థి మార్పుపై కాంగ్రెస్ సీనియర్ నేతలు, అధిష్టానంతో చర్చలు జరుపుతున్నారు. ఇందుకు సంబంధించి పూర్తి వివరాలు తెలియాల్సి ఉంది.

జి. మనోహర్