అమరావతి కోసం చంద్రబాబు ఫ్యామిలీ ఫోటో సెషన్

Posted: 10/21/2015 01:07 PM IST

అదేదో సినిమాలో ఫ్యామిలీ ఫ్యామిలీ అంతా ఉప్మా తిని బతికేస్తున్నట్లున్నారుగా అన్నట్లు చంద్రబాబు నాయుడు ఫ్యామిలీ అంతా ఫోటోలకు ఫోజులిచ్చారు. ఏపి సిఎం నారా చంద్రబాబు నాయుడు నుండి చంద్రబాబు నాయుడు మనువడితో సహా అందరూ కూడా ఫోటోలకు ఫోజులిచ్చారు. అయినా ఇంతలా ఫ్యామిలీ ఫ్యామిలీ అంతా ఫోటోలకు ఫోజులిచ్చేంత అవసరం ఏం వచ్చింది అనుకుంటున్నారా...? అమరావతి శంకుస్థాపనకు అంతా సిద్దం కాగా ఫోటోలకు అంత క్రేజీగా ఫోజులు ఎందుకు ఇచ్చారని మీకు అనుమానం కలిగిందేమో కానీ అమరావతి గురించే వాళ్లు అందరూ అలా ఫోటోలు దిగారు. అవును అప్పుడెప్పుడో ఏదో కారణం కోసం ఐస్ బకెట్ ఛాలెంజ్, రైస్ బకెట్ ఛాలెంజ్ ఎలా చేశారో అలా చంద్రబాబు నాయుడు ఫ్యామిలీ కూడా ఓ కారణం.. ఓ అవసరం కోసం ఇలా ఫోటోలకు ఫోజులిచ్చారు.

మన అమరావతి.. మన రాజధాని అంటూ నారా వారి ఫ్యామిలీ మొత్తం ఫోటోలకు ఫోజులిచ్చింది. అమరావతి శంకుస్థాపనకు సమయం దగ్గర పడుతున్న కొలదీ.. ఈ కార్యక్రమాన్ని ప్రమోట్ చెయ్యడం కోసం చంద్రబాబు ఫ్యామిలీ బాగా కష్టపడుతున్నారు. నిజానికి చిన్న కార్యక్రమం సక్సెస్ కావాలంటేనే ఎవరో ఒకరు దానిని ప్రమోట్ చెయ్యాలి కానీ ఆ బాధ్యతను కూడా తమ భుజాల మీద వేసుకొని.. ప్రజల్లోకి అమరావతిని తీసుకెళుతున్నారు బాబు ఫ్యామిలీ. మొత్తానికి బాబుగారి ఫ్యామిలీ మొత్తం అమరావతికి తమ వంతు సహాయంగానో లేదంటే ఉడతా భక్తిగానో ఫోటో సహాయం చేస్తున్నారన్న మాట.

*అభినవచారి*