గ్యాంగ్ రేప్ అంటే తెలుసా..? నాలుక కర్చుకున్న అమాత్యులు

Posted: 10/09/2015 05:33 PM IST

Rape by 2 is not gang rape karnataka minister s shocker apologizes later

ఓ మహిళపై ఇద్దరు అత్యాచారం చేస్తే కూడా గ్యాంగ్ రేపేనా? అది సామూహిక అత్యాచారం ఎలా అవుతుంది. గ్యాంగ్ రేప్ చేయాలంటే కనీసం ముగ్గురు నలుగురు ఉండాలన్న విషయం మీకు తెలుసా..? ఈ మాటలేవో సాదాసీదా వ్యక్తి అన్నవి కాదు. సాక్షాత్తూ కర్ణాటక హోంమంత్రి కేజే జార్జ్ నోటి వెంట జాలువారిన పదాలు. ఇద్దరు రేప్ చేస్తే అది గ్యాంగ్ రేప్ ఎలా అవుతుందంటూ మంత్రిగారు మీడియానే ఎదురు ప్రశ్నించారు. ముగ్గురు నలుగురు కలిసి చేస్తేనే అది గ్యాంగ్ రేప్ అవుతుందంటూ సరికొత్త భాష్యం చెప్పారు. అక్టోబరు 3వ తేదీన బెంగళూరులో ఓ బీపీఓ ఉద్యోగిని(22)పై ఇద్దరు వ్యక్తులు అత్యాచారం చేసిన ఘటనపై ఆయన పై విధంగా స్పందించారు.

ఉద్యోగినిపై అత్యాచారం కేసులో ఇద్దరు నిందితులను అరెస్ట్ చేసినట్టు తెలిపారు. తమ కంపెనీలో పనిచేస్తున్న మహిళా ఉద్యోగులకు రవాణా సౌకర్యం కల్పించాల్సిన బాధ్యత కంపెనీలపై ఉందన్నారు. మహిళల రక్షణకు తాము అన్ని చర్యలు తీసుకుంటున్నామని, పోలీసులు అప్రమత్తంగా ఉండి ఎప్పటికప్పుడు పెట్రోలింగ్ నిర్వహిస్తున్నారని వివరించారు. పనిలో పనిగా ఇద్దరు వ్యక్తులు చేస్తే అది గ్యాంగ్ రేప్ కాదని, ముగ్గురు, నలుగురు కలిసి చేస్తేనే గ్యాంగ్ రేప్ అవుతుందంటూ కొత్త నిర్వచనం ఇచ్చారు.

మంత్రి వ్యాఖ్యలపై దేశవ్యాప్తంగా నిరసనలు వ్యక్తమవుతున్నాయి. దీంతో నాలుక కరుచుకున్న మంత్రి.. ఆనక తాపీగా క్షమాఫణలు చెప్పారు. మంత్రి వ్యాఖ్యలపై జాతీయ మహిళా కమీషన్ కూడా మండిపడిన తరువాత తన తప్పును తెలుసుకున్న మంత్రిగారు క్షమాపణలు చెప్పారు. అయితే మంత్రి ఇలా వివాదాస్పద వ్యాఖ్యలు చేయడం ఇదే మొదటిసారి కాదు. గత ఏడాది నవంబర్‌లోనే ఇలాంటి వ్యాఖ్యలే చేశారు. టీఆర్‌పీ రేటింగ్స్ కోసం మీడియా కావాలనే సెక్స్ పరమైన వార్తలను ఎక్కువ చేసి చూపిస్తోందంటూ అక్కసు వెళ్లగక్కారు.

జి. మనోహర్