సినిమాకు ఆహ్వానించి.. తాంబులం అందుకున్న దర్శకుడు..

Posted: 10/08/2015 01:56 PM IST

విడుదలకు ముందు అనేక బాలారిష్టాలను ఎదుర్కోని.. చివరకు వాయిదాల పరంపరకు స్వస్తి పలికి.. అక్టోబర్ 9న రిలీజ్కు రెడీ అవుతన్న ప్రతిష్టాత్మక చిత్రం 'రుద్రమదేవి'కి తెలంగాణ రాష్ట్ర ప్రభుత్వం నుంచి సహకారం లభించింది. తెలంగాణ చరిత్ర నేపథ్యంలో రూపుదిద్దుకున్న ఈ చిత్రానికి ముఖ్యమంత్రిని అహ్వానించేందుకు వెళ్లిన ఆ దర్శకుడు.. అనూహ్యంగా ప్రభుత్వ తాంబూలం అందుకున్నాడు. ఓరుగల్లు వీరనారి రుద్రమదేవి కథగా తెరకెక్కిన ఈ సినిమాకు వినోద పన్ను నుంచి మినహాయింపు కల్పిస్తున్నట్లు తెలంగాణ ముఖ్యమంత్రి కేసీఆర్ ప్రకటించారు. చిత్ర దర్శకనిర్మాత గుణశేఖర్ తో పాటు, నిర్మాత దిల్ రాజు గురువారం కేసీఆర్ ను కలిసిన నేపథ్యంలో ఈ మేరకు హామి ఇచ్చారు.

ఈ సందర్భంగా ముఖ్యమంత్రి కేసీఆర్ ను రుద్రమదేవి సినిమా ప్రీవ్యూ చూడాల్సిందిగా కేసీఆర్ ను ఆహ్వానించారు. కేసీఆర్ కూడా సానుకూలంగా స్పందిస్తూ అందుకు సమ్మతి తెలిపారు. తెలంగాణ చరిత్ర, సంస్కృతిని ప్రతిబింబించే చిత్రాలకు రాష్ట్ర ప్రభుత్వ ప్రోత్సాహం ఎప్పుడూ ఉంటుందని ఈ సందర్భంగా కేసీఆర్ అన్నారు. రుద్రమదేవిగా అనుష్క నటిస్తున్న ఈ సినిమాలో అల్లు అర్జున్, రానా, ప్రకాష్ రాజ్లు ఇతర కీలక పాత్రల్లో నటించారు. తన సొంత నిర్మాణ సంస్థ గుణ టీం వర్క్స్ బ్యానర్ పై గుణశేఖర్ స్వయంగా ఈ సినిమాను నిర్మిస్తూ దర్శకత్వం వహించారు.

జి. మనోహర్