చపాతీలు గుండ్రంగా చేయలేదని కూతుర్ని చంపిన కసాయి

Posted: 10/02/2015 12:42 PM IST

Pakistani father killed daughter anikha round chapatis

చపాతీలు ఏ రూపంలో వుంటేనేం.. తినడానికి దొరికితే ఎవరైనా లాగించేస్తారు. రంగు, రుచి అంటూ పట్టింపులేమీ లేకుండా కడుపు నింపుకుంటారు. కానీ.. ఓ కసాయి తండ్రి మాత్రం చపాతీలు గుండ్రంగా చేయలేదన్న కారణంతో కన్నకూతర్నే దారుణంగా కొట్టి చంపేశాడు. ఇందుకు తన కొడుకు సహాయం కూడా తీసుకున్నాడు. మరోసారి తప్పు దొర్లకుండా గుండ్రంగా చపాతీలు చేస్తానంటూ ఆ అమ్మాయి మొరపెట్టుకుంటున్నప్పటికీ.. ఆ కసాయి తండ్రి మానవత్వం లేని మృగంలా దారుణంగా కొట్టాడు. దీంతో ఆ అమ్మాయి చనిపోయింది. ఈ ఘటన పాకిస్థాన్ లోని ఇస్లామాబాద్ లో చోటు చేసుకుంది. ఈ ఘటనతో పాకిస్తాన్ మహిళల పరిస్థితి ఎంత దారుణంగా వుందో అర్థం చేసుకోవచ్చు.

పూర్తి వివరాల్లోకి వెళ్తే.. ఇస్లామాబాద్లోని అజీమ్ పార్క్ ప్రాంతంలో నివాసముంటున్న ఓ వ్యక్తికి అనీఖా అనే పదమూడేళ్ల కూతురు వుంది. తనకు చపాతీలు చేసివ్వమని చెప్పగా.. ఆ అమ్మాయి వెంటనే సిద్ధం చేసింది. అయితే.. చపాతీలు గుండ్రంగా లేవని ఆ కసాయి తండ్రి అనీఖాని చావబాదాడు. అతని కొడుకు కూడా ఆ అమ్మాయిని దారుణంగా కొట్టాడు. తనను వదిలిపెట్టమని ఎంతో ఆవేదనతో వేడుకున్నప్పటికీ.. ఆ తండ్రీకొడుకులిద్దరి మనస్సు కరగలేదు. ఇంకా గట్టిగా కొట్టడం మొదలుపెట్టారు. ఆ దెబ్బల్ని వేగలేకపోయిన ఆ చిన్నారి.. స్పృహ కోల్పోయింది. దీంతో ఆందోళనకు గురైన ఆ తండ్రీకొడుకులు.. ఆమెను ఆసుపత్రికి తరలించేందుకు ప్రయత్నించారు. అయితే.. మార్గమధ్యంలోనే ఆ చిన్నారి ప్రాణాలు విడిచింది. దాంతో వాళ్లు ఆమె మృతదేహాన్ని దగ్గర్లో ఉన్న పొలాల్లో పారేసి అక్కడి నుంచి వెళ్లిపోయారు.

ఆ దిశగా వెళుతున్న కొందరు వ్యక్తులు మృతదేహాన్ని గమనించి.. పోలీసులకు సమాచారం అందించారు. రంగంలోకి దిగిన పోలీసులు విచారణ చేపట్టగా.. అసలు విషయం బయటపడింది. ఆ చిన్నారిని తామిద్దరం తీవ్రంగా కొట్టినట్లు తండ్రి, కొడుకు ఇద్దరూ అంగీకరించారు.

AS