చంద్రబాబు ‘హస్తం’ కోరిన సింగపూర్ ప్రధాని

Posted: 09/12/2015 11:20 AM IST

Singapore pm lee hsien loong write letter ap cm chandrababu naidu

విశ్వవిఖ్యాత దేశాల్లో ఒకటైన సింగపూర్ తో ఏపీ చంద్రబాబు నాయుడికి గట్టి బంధమే వుంది. అందుకే.. ఏ సందర్భంలోనైనా రాజధాని విషయమై ప్రస్తావించినప్పుడు ఆయన సింగపూర్ మాట ఎత్తనిదే ఉండలేరు. అక్కడి అభివృద్ధి పనులు ఎంతో వేగవంతంగా వుండటమే కాకుండా అత్యాధునిక టెక్నాలజీతో కూడి వుంటాయి కాబట్టి.. ఏపీ రాజధాని ‘అమరావతి’ నిర్మాణాన్ని సింగపూర్ కి అప్పగించారు. ఈ కారణం వల్లనే ఏమో.. ఆ దేశ ప్రధాని ఈయనతో స్నేహంగా మెలుగుతున్నట్లు కనిపిస్తోంది. ఇందుకు సాక్ష్యంగా.. స్వయంగా ఆయన బాబుకు రాసిన తాజా లేఖ నిలుస్తుందని చెప్పుకోవడం ఎటువంటి అతిశయోక్తి లేదు. ప్రస్తుతం ఈ వార్తే తెలుగు రాష్ట్రాల్లో హల్ చల్ చేస్తోంది.

సింగపూర్ ప్రధాని అయిన ఎల్.హెచ్.లూంగ్ శుక్రవారం చంద్రబాబుకు ఓ లేఖ రాశారు. భవిష్యత్తులో కలిసి పనిచేద్దామని అందులో ఆయన బాబుకు సూచించారు. ఇంతకీ ఆ లేఖ ఎందుకు రాశారంటే.. ఇటీవల సింగపూర్ లో జరిగిన సాధారణ ఎన్నికల్లో అధికార ‘పీపుల్స్ యాక్షన్ పార్టీ’ మరోసారి స్పష్టమైన ఆధిక్యంతో విజయం సాధించింది. దీంతో ప్రస్తుతం ప్రధానిగా కొనసాగుతున్న లూంగ్ తదుపరి కూడా ఆ బాధ్యతల్ని చేపట్టనున్నారు. ఈ క్రమంలోనే ఆయన తన పార్టీ విజయాన్ని ప్రస్తావిస్తూ బాబుకు లేఖ రాశారు. ‘నవ్యాంధ్రప్రదేశ్ నూతన రాజధాని అమరావతి మాస్టర్ ప్లాన్ రూపకల్పనలో భాగస్వామిగా అవకాశం ఇచ్చినందుకు చాలా కృతజ్ఞతలు. భవిష్యత్తులో ఇలాగే మీతో కలిసి పనిచేసేందుకు సిద్ధంగా వున్నాం’ అని లూంగ్ ఆ లేఖలో పేర్కొన్నారు.