రఘువీరా.. పిసీసీ అద్యక్షుడిగా పనికిరారు: సోమిరెడ్డి

Posted: 08/08/2015 09:13 PM IST

ఆంధ్రప్రదేశ్ కు ప్రత్యేక హోదా కోసం కాంగ్రెస్ నిర్వహించిన పోరు సభలో ఓ యువకుడు ఒంటిపై కిరోసిన్ పోసుకుని నిప్పంటించుకున్న ఘటనపై టీడీపీ పాలిట్ బ్యూరో సభ్యుడు, ఎమ్మెల్సీ సోమిరెడ్డి చంద్రమోహన్ రెడ్డి తీవ్రస్థాయిలో స్పందించారు. ఈ ఘటన చోటుచేసుకోవడం దురదృష్టకరమని అన్న ఆయన కాంగ్రెస్ నిర్వహించిన కార్యక్రమంలో ఈ తరహా ఘటన చోటుచేసుకున్న నేపత్యంలో ఏపీ పిసీసీ అధ్యక్షుడిగా రఘువీరారెడ్డి పనికిరారని అర్థమవుతుందని విరుచుకుపడ్డారు.. రఘువీరారెడ్డి చేతకాని తనం వల్లే తిరుపతి ఘటన జరిగిందని విమర్శించారు.

శనివారం ఆయన మీడియాతో మాట్లాడుతూ ఈ ఘటనకు భాద్యత వహిస్తూ పీసీసీ చీఫ్‌ పదవికి రఘువీరా రాజీనామా చేయాలని డిమాండ్ చేశారు. ఈ ఘటనకు పూర్తి భాధ్యత కాంగ్రెస్ పార్టీదేనన్నారు. ప్రజలు, ముఖ్యంగా యువకులు ఉద్రేకాలకు లోనుకావద్దని ఆయన సూచించారు. ఏపీకి ప్రత్యేక హోదా రావాలని అందరూ కోరుకుంటున్నారని తెలిపారు. ప్రత్యేక హోదా తెచ్చేందుకు టీడీపీ కట్టుబడి ఉందని ఆయన గుర్తు చేశారు. ప్రత్యేక హోదాపై మరో మాటకు తావులేదని సోమిరెడ్డి ఉద్ఘాటించారు.

ఏపీకి ప్రత్యేక హోదా కోసం యువకుడి ఆత్మహత్యాయత్నం చేసుకోవడం బాధాకరమని ఆంధ్రప్రదేశ్ ఉపముఖ్యమంత్రి కేఈ కృష్ణ మూర్తి ఆవేదన వ్యక్తం చేశారు. ఈ అంశమై  మీడియాతో మాట్లాడిన ఆయన ప్రత్యేక హోదా రాకపోవడానికి కాంగ్రెస్సే కారణమని ఆరోపించారు. రాష్ట్ర విభజన సమయంలోనే ప్రత్యేక హోదాను బిల్లులో చేర్చిఉంటే ఇప్పుడు ఈ పరిస్థితి వచ్చేది కాదన్నారు. సీఎం చంద్రబాబు రాష్ట్రానికి ప్రత్యేక హోదా సాధిస్తారు కేఈ ధీమా వ్యక్తం చేశారు.

జి. మనోహర్