టీడీపీ ‘వాడుకుని వదిలేసి విధానా’ బాధితుడు పవన్ కల్యాన్

Posted: 07/08/2015 02:09 PM IST

తెలుగు దేశం పార్టీ వాడుకుని వదిలేసే విధానం ఇప్పుడు జనసేన అధినేత, సినీ నటుడు, పవర్ స్టార్ పవన్ కల్యాన్ కు అర్థమైందని వైఎస్సార్ కాంగ్రెస్ వ్యాఖ్యానించింది. , టీడీపీ అధినేత, ఆంధ్రప్రదేశ్ ముఖ్యమంత్రి చంద్రబాబు అసలు నైజం, రంగురెండు ఇప్పుడు బయటపడ్డాయని వైసీపీ అధికార ప్రతినిధి అంబటి రాంబాబు తీవ్రస్థాయిలో దుయ్యబట్టారు. అవసరం వచ్చినప్పడల్లా తనకు కావాల్సిన వారిని దువ్వుకుని పనులు చేయించుకునే బాబు.. అవసరం తీరగానే వారిని వదిలేయడం అయనకు పరిపాటిగా మారిందన్నారు.

పవన్ కళ్యాణ్ ను కూడా చంద్రబాబు వాడుకుని వదలివేసినట్లేనని అంబటి రాంబాబు వ్యాఖ్యానించారు. పవన్ కళ్యాణ్ పై టిడిపి ఎంపీలు కేశినేని నాని తదితరులు విమర్శలు చేయడాన్ని ప్రస్తావిస్తూ , ఇదంతా చంద్రబాబు డైరెక్షన్ లోనే జరుగుతోందని చెప్పుకోచ్చారు. చంద్రబాబుకు చెప్పకుండా టిడిపి ఎంపీలు అలా విమర్శలు చేయరని ఆయన అన్నారు. ఒకవైపు కొందరిని పవన్ కళ్యాణ్ ను విమర్శించడానికి పురమాయించి, మరోవైపు పవన్ కళ్యాణ్ కు మద్దతు తోనే తాము అధికారంలోకి వచ్చామని రెండు నాలుకల సిద్దాంతాన్ని చంద్రబాబు వాడుతున్నారని దుయ్యబట్టారు. చంద్రబాబు ద్వంద నీతిని ఇప్పటికైనా పవన్ కల్యాన్ గుర్తించాలన్నారు. చంద్రబాబుకు ఎవరినైనా వాడుకుని వదలివేయడం అలవాటేనని, గతంలో జూనియర్ ఎన్టీఆర్ ను వాడుకుని వదిలేసిన చంద్రబాబు, ఇప్పుడు అదే పరిస్థితి పవన్ కళ్యాణ్ కు కూడా ఎదురైందని అన్నారు. ఇప్పుడు పవన్ కళ్యాణ్ దీనిపై స్పందించవలసిన బాద్యత ఏర్పడిందని ఆయన అన్నారు.

జి. మనోహర్