ITEMVIDEOS: ప్రియుడ్ని చితకబాది.. ప్రియురాల్ని లాక్కెళ్లారు

Posted: 06/29/2015 06:14 PM IST

పెద్దలు తమ పెళ్లిని అంగీకరించకపోతే చాలు.. ప్రేమజంటలు ఆత్మహత్యలకు పాల్పడటమో, లేచిపోవడమో, ఎవరికీ తెలియకుండా ఆర్యసమాజ్ లేదా గుడిలో పెళ్లిచేసుకోవడమో వంటి చర్యలకు పాల్పడుతుంటారు. వీటిల్లో ఎక్కువగా కనిపించే వైనాలు ఆర్యసమాజ్ లో పెళ్ళిచేసుకోవడం. ముందుగా ఓ ప్లాన్ వేసుకోవడం, ఇంట్లో ఎవరికీ చెప్పకుండా పారిపోవడం, ఆ తర్వాత ఆర్యసమాజ్ లో పెళ్లి చేసుకోవడం.. ఇలా ఎన్నో జంటలు చేస్తుంటాయి. ఈ తరహాలోనే ఓ జంట ఆర్యసమాజ్ లో పెళ్లి చేసుకుంటుండగా.. వారి పెళ్లిని అమ్మాయి కుటుంబీకులు అడ్డుకున్నారు.

వివరాల్లోకి వెళ్తే.. హైదరాబాద్ నగరం, సైదాబాద్ లోని ఓ ఆర్యసమాజ్ లో ఓ ప్రేమజంట వివాహం చేసుకునేందుకు సిద్ధపడింది. కాసేపట్లో ఆ యువతీయువకుల వివాహం ముగుస్తుందనగా.. అక్కడికి యువతి కుటుంబసభ్యులు చేరుకున్నారు. అంతే.. ప్రియుడ్ని బాగా చితకబాది, యువతిని బలవంతంగా అక్కడి నుంచి లాక్కెళ్లారు. యువతి రానంటూ ఎంతగా పెనుగులాడినా.. కుటుంబసభ్యులు ఆమెకీ రెండు తగిలించి ఓ బైకులో తీసుకెళ్లారు. దీంతో సైదాబాద్ లో కొద్దిసేపటివరకు గందరగోళం పరిస్థితి నెలకొంది. అకస్మాత్తుగా యువతి కుటుంబీకులు గుంపుగా వచ్చి యువకుడిపై దాడి చేయడంతో అక్కడి స్థానికులు సైతం ఒక్కసారిగా అవాక్కయ్యారు.

ఈ మొత్తం వ్యవహారాన్ని కొందరు యువకులు తమ మొబైల్ లో వీడియో చిత్రీకరించారు. ఆ వీడియోల్లో ముఖ్యంగా అమ్మాయిని తీసుకువెళ్తున్న వైనమే ఎక్కువగా కనిపిస్తోంది. మరోవైపు.. ఈ మొత్తం తతంగాన్ని చిత్రీకరించిన మీడియా వారిని కూడా యువతి బంధువులు దుర్భాషలాడడం జరిగింది. ఏదేమైనా.. ఈ ప్రేమవ్యవహారం మరిన్ని వివాదాలకు దారి తీస్తుందోనని అంతా భావిస్తున్నారు.