వాహనదారులకు చేదు వార్త.. పెరిగిన పెట్రోల్ .. తగ్గిన డీజిల్ ధరలు

Posted: 06/15/2015 08:01 PM IST

యూపీఏ హయాంలో పెరగడమే తప్ప తరగడం తెలియక పైపైకి ఎగబాకిన చమురు ధరలు అంతర్జాతీయంగా చోటుచేసుకుంటున్న తాజా పరిణామాలతో గత ఏడాది జూలై మాసం నుంచి కిందకు దిగివచ్చినట్లే వచ్చి.. తాజాగా మళ్లీ పైకి ఎగబాకుతున్నాయి. వాహనదారుల చేదుగుళిక లాంటి వార్తనందిస్తూ.. వారి జేబులకు చిల్లులు పెడుతూ.. పెట్రోల్ ధర మళ్లీ పైకి ఎగబాకింది. రెండు నెలల వ్యవధిలో మూడో పర్యాయం పెట్రోల్ ధర పైకి ఎగబాకింది. అయితే మరోవైపు డీజిల్ ధరలు మాత్రం కిందకు దిగివచ్చాయి.

దేశవ్యాప్తంగా పెట్రోల్ ధరలు పెంపు కోసం కాచుకు కూర్చున్న చమురు సంస్థలకు కేంద్రంలోని మోడీ ప్రభుత్వం పచ్చజెండా ఊపింది. లీటరు పెట్రోలు ధర 64 పైసలు పెంచుతున్నట్లు కేంద్ర చమురు మంత్రిత్వ శాఖ సోమవారం ప్రకటించింది. కాగా, డీజిల్ ధర మాత్రం రూ. 1.35 తగ్గింది. పెంచిన ధరలు ఈరోజు అర్ధరాత్రి నుంచి అమలులోకి రానున్నాయి. రెండు వారాల కిందటే పెట్రోల్, డీజిల్ ధరలు పెరిగిన నేపథ్యంలో తాజా పెంపు నిర్ణయం వినియోగ దారులకు మరింత భారం కానుంది.

జి.మనోహర్