ఓటుకు నోటు కేసులో.. ఈరోజు చాలా కీలకం

Posted: 06/15/2015 09:01 AM IST

Today very important in the case of cash for vote

ఓటుకు నోటు వ్యవహారంలో నేడు ఎంతో కీలకంగా ఉండబోతోంది. తెలంగాణ టిడిపి ఎమ్మెల్యే రేవంత్ రెడ్డి ఈ కేసులో ఏసీబీ విచారణ పూర్తైంది. జ్యుడీషియల్ కస్టడీ నేటితో ముగుస్తోంది. దీంతో ఏసీబీ అధికారులు ఆయనను కోర్టులో హాజరుపర్చనున్నారు. ఈ వ్యవహారం ఎన్నికల ప్రక్రియను అపహాస్యం చేసేదిగా ఉందని ఏసీబీ కోర్టు న్యాయమూర్తి లక్ష్మీపతి గతంలో పేర్కొన్న నేపథ్యంలో రేవంత్ రెడ్డికి మరికొన్ని రోజులు రిమాండ్ విధించే అవకాశాలు కనిపిస్తున్నాయి. ఇప్పటికే 14 రోజుల పాటు రిమాండ్ లో ఉన్న రేవంత్ రెడ్డి.. ఒక్క రోజు అది కూడా కూతురు నిశ్చితార్థం కావడంతో తాత్కాలిక బెయిల్ మీద విడుదలయ్యారు. కానీ గట్టి నిఘా మధ్య చాలా ఆంక్షల మధ్య రేవంత్ బయటకు వచ్చారు. అయితే 14 రోజుల రిమాండ్ ముగిసిపోవడంతో నేడు కోర్టుకు హాజరుకానున్నారు రేవంత్.

ఇక ఇదే కేసులో మరో కీలక సన్నివేశం చోటుచూసుకోనుంది. ఓటుకు నోటు వ్యవహారంలో అతి కీలకంగా వ్యవహరించిన నామినేటెడ్ ఎమ్మెల్సీ స్టీఫెన్ సన్ వాంగ్మూలాన్ని నేడు ఏసీబీ అధికారులు రికార్డు చెయ్యనున్నారు. ఈ వ్యవహారంలో సోమవారం అత్యంత కీలక పరిణామాలు జరుగనున్నాయి. ఈ కేసులో ప్రధాన సాక్షి అయిన నామినేటెడ్ ఎమ్మెల్యే స్టీఫెన్‌సన్ వాంగ్మూలాన్ని మెజిస్ట్రేట్ ఎదుట నమోదు చేయనుండడంతో పాటు వీడియో, ఆడియో రికార్డులకు సంబంధించి ఫోరెన్సిక్ నివేదిక న్యాయస్థానానికి అందనుంది. చంద్రబాబు మాట్లాడిన ఆడియో టేపులు దేశవ్యాప్తంగా సంచలనం సృష్టించిన నేపథ్యంలో స్టీఫెన్‌సన్ వాంగ్మూలం కీలకం కానుంది.

*అభినవచారి*