శ్రీనగర్ లో ఇస్తామిక్ స్టేట్, పాకిస్థాన్ పతాకాల కలకలం

Posted: 06/12/2015 09:30 PM IST

జమ్ము కాశ్మీర్ లో బిజేపి మద్దుతుతో పిడిపి నేతృత్వంలో ఏర్పడిన  ప్రభుత్వం.. వేర్పాటు వాదుల పట్ల, వారి దుశ్చర్యల పట్ల చేష్టలుడికి చూస్తున్న క్రమంలో అక్కడి హురియత్ మద్దతుదారులు మరోసారి రెచ్చిపోయారు. గతంలో పలు సందర్బాలలో పాకిస్తాన్ కు చెందిన జెండాలను ఉరేగించినా.. అటు రాష్ట్ర ప్రభుత్వం కానీ, ఇటు కేంద్ర ప్రభుత్వం కానీ ఆ చర్యలపై పెద్దగా చర్యలు తీసుకోకుండా నిమ్మకు నిరేత్తినట్లు వ్యవహరించడంతో..  వేర్పాటు వాదులు రోజురోజుకు బలం పుంజుకుంటున్నారు. ప్రతీ శుక్రవారం మధ్యాహ్నం ప్రార్థనల తరువాత వారు రోజుకో విధంగా ప్రభుత్వాలను కవ్విస్తున్నారు. స్థానిక ప్రజలను భయభ్రాంతులకు గురిచేస్తున్నారు.

తాజాగా,  శ్రీనగర్లోని ఓ మసీదు వద్ద ఇస్లామిక్ స్టేట్ ఉగ్రవాద సంస్థ జెండాలను వీధుల్లో ఊరేగించారు. అలాగే జమ్ములోని కుప్వారా జిల్లాతో పాటు కాశ్మీర్లో కూడా పాకిస్థానీ జెండాలు మళ్లీ కనిపించాయి. హురియత్ నాయకుడు మీర్వాయిజ్ ఉమర్ ఫరూఖ్ మద్దతుదారులు ఇస్లామిక్ స్టేట్ జెండాలను జమామసీదు సమీపంలో ఎగరేశారు. ఇంతకుముందు పలు సందర్భాల్లో పాకిస్థానీ, లష్కరే తాయిబా జెండాలు కూడా కాశ్మీర్ లోయలో కనిపించినా.. ఇస్లామిక్ స్టేట్ జెండాలు కనిపించడం మాత్రం ఇదే మొదటిసారి.

దీంతో జమ్ము కాశ్మీర్ రాష్ట్రంలోకి ఇస్లామిక్ స్టేట్ క్రమంగా చాపకింద నీరులా చొచ్చుకొస్తోందా అనే అనుమానాలు వ్యక్తమవుతున్నాయి. పార్లమెంటు మీద దాడికేసు దోషి అఫ్జల్ గురు అస్థికలను అతడి స్వగ్రామానికి రప్పించాలని నిరసనకారులు డిమాండ్ చేస్తున్నారు. అదిలోనే చర్యలు తీసుకోని పక్షంలో వేర్పాటు వాదులు మరింత బలం పుంజుకుని కవ్వింపులకు పాల్పడతారని స్తానికులు అందోళన వ్యక్తం చేస్తున్నారు. కాశ్మీర్ లోయలో ఇలాంటి సంఘటనలు వద్దంటూ కేంద్రం గతంలో హెచ్చరించినా.. వేర్పాటువాదులు మాత్రం తరచు పాకిస్థాన్ జెండాలను ఎగరేస్తూనే ఉన్నారు.. ఇప్పుడిది అటు కేంద్రంలోని ప్రధాని మోడీ ప్రభుత్వానికి, ఇటు బిజేపికి కూడా ఇబ్బందులు తెచ్చిపెడుతోంది.

జి మనోహర్