బ్రతికేవున్న పాపను చంపబోయిన ప్రైవేట్ డాక్టర్లు

Posted: 06/10/2015 07:06 PM IST

ప్రైవేటు ఆస్పత్రుల్లో మెరుగైన వైద్యం లభిస్తుందన్న ఉద్దేశంతో చాలామంది అటువైపే ఎక్కువ దృష్టి సారిస్తారు. ఎంత డబ్బులు ఖర్చైనా ఫర్వాలేదని తెగించి మరీ ముందుకొస్తారు. అయితే.. తాజాగా చోటు చేసుకున్న సంఘటన ప్రజల్లో వున్న ఆ నమ్మకాన్ని ఒమ్ము చేసిందనడంలో ఎటువంటి అతిశయోక్తి లేదు. బ్రతికేవున్న పాపను చనిపోయిందని నిర్ధారించిన ప్రైవేట్ ఆస్పత్రి డాక్లర్ల నిర్వాకంతో పసిపాప ప్రాణాలు పోవాల్సిన పరిస్థితి తలెత్తింది.

పూర్తి వివరాల్లోకి వెళ్తే.. విజయవాడకు చెందిన ఓ దంపతులు తమ ఏడాది పాపకు తీవ్ర అనారోగ్యం రావడంతో ఓ ప్రైవేటు ఆస్పత్రికి తీసుకువెళ్లారు. అక్కడ ఆమెకు చికిత్స చేసిన వైద్యులు.. పాప మృతి చెందిందని డిశ్చార్జ్ చేశారు. దీంతో ఎంత డబ్బు ఖర్చు చేసినా తమ పాప మిగల్లేదని, కడుపుకోతే మిగిలిందని ఆ దంపతులు నిరాశతో కూరుకుపోయారు. ఆ పాపను ఖననం చేసేందుకు వాళ్లు శ్మశానానికి తీసుకెళ్లారు. అయితే.. ఇంతలోనే ఆ పాప ఊపిరి తీసుకోవడాన్ని ఆ దంపతులు గమనించారు.

అంతే! ఖననం తంతుని ఆపేసి.. క్షణం ఆలస్యం చేయకుండా ఆ దంపతులు తమ పాపను వెంటనే ప్రభుత్వాస్పత్రికి తరలించారు. అక్కడ వైద్యులు ఆమెకు మెరుగైన చికిత్స అందిస్తున్నారు. దీంతో అప్పటివరకు విషాదంలో మునిగిపోయిన ఆ దంపతుల జీవితంలో తిరిగి సంతోష ఘడియలు తిరిగి వచ్చాయి. మరోవైపు.. ప్రైవేట్ ఆస్పత్రి డాక్టర్ల నిర్వాకంపై విమర్శలు వెల్లువెత్తుతున్నాయి.