ఉద్యోగులకు వ్యక్తిగత షేర్ల దారదత్తం.. హౌసింగ్ డాట్ కామ్ సీఈఓ ఔదార్యం

Posted: 05/14/2015 09:14 PM IST

Housing com boss gifts his shares to staff

సంస్థను నడిపించేందుకు మంచి ఆలోచనలతో పాటు ఉద్యోగులంటే ఔదార్యం కూడా వుండాలని అంటున్నాడు ఇక్కడ ఓ కుర్ర సీఈఓ. ఇలాంటి మాటలను చెప్పాలంటే.. ముందు మీరు ఏదేనా చేయాలి ఆ తరువాతే చెప్పాలి అంటున్నారా..? ఆయన అలాంటి పనిచేసే సంచలనం సృష్టించారు. ఒకటి రెండు కాదు ఏకంగా తన రెండు వందల కోట్ల రూపాయల వ్యక్తిగత షేర్లను సంస్థలోని కార్మికులకు దారాదత్తం చేశారు. ఎవరాయనా.. అంత ఔదార్యమున్న సీఈఓ ఎవరు..? ఏమా కథ అంటున్నారా..?

హౌసింగ్‌డాట్‌కామ్ చీఫ్ ఎగ్జిక్యూటివ్ రాహుల్ యాదవ్ ఆ కంపెనీలో ఉన్న తన వాటా మొత్తాన్ని ఉద్యోగులకు కానుకగా ఇచ్చివేశారు. కంపెనీ సీఈఓగా రాజీనామా చేసి, ఆ రాజీనామాను ఉపసంహరించుకున్న ఆయన.. వారం రోజుల్లోనే ఇలాంటి ఆశ్చర్యకరమైన నిర్ణయాన్ని ప్రకటించారు. తన ఈ నిర్ణయంతో సంస్థలోని ఉద్యోగులందరినీ ఆయన వాటాదారులను చేశారు. 2012లో స్థాపించిన ఈ సంస్థ గత ఏడాది సుమారుగా 120 మిలియన్ డాలర్లను సంపాదించగా, ఈ ఏడాది 90 మిలియన్ డాలర్లను ఆర్జించిందని, ప్రస్తుతం సంస్థ సుమారుగా 300 మిలియన్ డాలర్ల టర్నోవర్ తో సాగుతుందని సమాచారం.

తన సంస్థ హౌసింగ్ డాట్‌కామ్‌లో పనిచేస్తున్న మొత్తం 2,251 మంది ఉద్యోగులకు ఆయన తన వ్యక్తిగత షేర్లను ఇచ్చివేశారని డాట్‌కామ్ వెల్లడించింది. ఈ వాటా విలువ ఉద్యోగుల ఏడాది వేతనానికి సమానమని పేర్కొంది. రాహుల్ యాదవ్ తీసుకున్న ఈ నిర్ణయాన్ని త్వరలో బోర్డు కూడా అమోదించనుందని సమాచారం. తన వయస్సు 26 సంవత్సరాలేనని, ఇప్పుడే డబ్బు గురించి సీరియస్‌గా ఆలోచించడం తొందరపాటవుతుందనే ఉద్దేశంతోనే ఈ వాటాను ఉద్యోగులకు ఇచ్చినట్లు యాదవ్ పేర్కొన్నారు.

జి. మనోహర్