అలవాటు లేని పని చేసి.. సృహ తప్పిన మంత్రి

Posted: 03/14/2015 09:19 PM IST

ఎప్పుడూ అలవాటు లేని పనులు చేసి అరోగ్యం మీదరు తెచ్చుకున్నాడు భీహార్ లో ఓ మంత్రి. భూసేకరణ బిల్లుకు వ్యతిరేకంగా చేస్తున్న నిరసన దీక్షలో బీహార్ మంత్రి లెస్సీ సింగ్ కళ్లు తిరిగి పడిపోయారు. దాంతో ఆయనను పూర్నియా జిల్లాలోని సదర్ ఆస్పత్రిలో చేర్చారు. ఆయనకు ప్రమాదం ఏమీ లేదని.. అయినా ముందు జాగ్రత్తగా ఐసీయూలో చేర్చామని పూర్నియా ఆస్పత్రి సివిల్ సర్జన్ ఎస్ఎన్ ఝా తెలిపారు.

మంత్రికి గ్యాస్ట్రో సమస్యలు ఉన్నాయని, నిరాహార దీక్ష చేయడం వల్ల బీపీ కూడా పెరిగిందని, అందుకే కళ్లు తిరిగి పడిపోయారని.. వారం రోజులు విశ్రాంతి తీసుకోవాల్సిందిగా సూచించామని చెప్పారు. ధందహా నియోజకవర్గానికి ప్రాతినిధ్యం వహిస్తున్న లెస్సీసింగ్.. సామాజిక న్యాయం, విపత్తు నివారణ శాఖ మంత్రిగా నితీష్ కుమార్ కేబినెట్లో ఉన్నారు. ఆరోగ్యం బాగోలేకపోయినా నిరసన ప్రదర్శనలో పాల్గొన్నందుకు బీహార్ జేడీ(యూ) అధ్యక్షుడు వశిష్ట నారాయణ్ సింగ్ మంత్రి లెస్సీని అభినందించారు.

జి. మనోహర్