డెలివరీ గదిగా మారిన పోలిస్ స్టేషన్..

Posted: 02/05/2015 08:14 AM IST

పోలిస్ స్టేషన్ లు ఈ మధ్యకాలంలో కళ్యాణ మండపాలుగా మారిన ఘటనలు మనం చూశాం. అదేనండి పెద్దలు అంగీకరించని కులాంతర వివాహాలు చేసి.. పోలీసులు శబాష్ అనిపించుకున్న అనేక సందర్బాలు చూశాం. అయితే ఇదే క్రమంలో ఆ పోలిస్ స్టేషన్ డెలివరీ గదిగా మారింది. అదేలా అంటారా..? ఓ యువకుడి చేతిలో మోసపోయిన యువతి ఫిర్యాదు చేయడానికని వచ్చి పోలీస్‌స్టేషన్ ఆవరణలోనే ప్రసవించింది. ఈ ఘటన మహబూబ్‌నగర్ జిల్లా బాలానగర్ మండల కేంద్రంలో చోటుచేసుకుంది.

మండలంలోని మోతిఘనపూర్ గ్రామపంచాయతీ మెడిగడ్డ తండాకు చెందిన యువతి, అదే గ్రామానికి చెందిన రమేష్ ప్రేమించుకుంటున్నారు. ఈ క్రమంలో యువతి గర్భం దాల్చింది. కానీ అతడు పెళ్లికి నిరాకరించాడు. దీంతో బాధితురాలు బాలానగర్ పోలీస్‌స్టేషన్‌లో ఫిర్యాదు చేసింది. కేసు నమోదు చేసుకున్న ఎస్‌ఐ అశోక్‌కుమార్ విచార ణ కోసం బుధవారం యువతిని పోలీస్‌స్టేషన్‌కు పిలిపించారు. అక్కడ పురిటినొప్పులు రావడంతో పక్కనే ఉన్న ప్రభుత్వ ఆసుపత్రి సిబ్బందితో వైద్య చికిత్సలు చేయిస్తుండగా మగశిశువుకు జన్మనిచ్చింది. కానీ శిశువుకు ఏడు నెలలు కూడా నిండకపోవడంతో మృతి చెందింది.

జి.మనోహర్