విశ్వశ్రేణి నగరంలా ఢిల్లీ.. విజన్ డాక్యుమెంట్ లో బీజేపి హామి

Posted: 02/03/2015 06:32 PM IST

Bjp promises to make delhi a world class city

మరో నాలుగు రోజుల్లో (ఫిబ్రవరి 7న) జరగనున్న ఢిల్లీ అసెంబ్లీ ఎన్నికల నేపథ్యంలో బీజేపీ మంగళవారం విజన్ డాక్యుమెంట్ విడుదల చేసింది. ఢిల్లీని విశ్వశ్రేణి నగరంగా తీర్చిదిద్దుతామని హామీయిచ్చింది. ఢిల్లీలోని పార్టీ కార్యాలయంలో బీజేపి ముఖ్యమంత్రి అభ్యర్థి కిరణ్ బేడీ విజన్ డాక్యూమెంట్ ను విడుదల చేసింది. ఢిల్లీలో నెలకొన్న పరిస్ధితులను ఎదుర్కొనే రీతిలో రోడ్ మ్యాప్ ప్రకటిస్తూ ఈ మేరకు విజన్ డాక్యుమెంట్ విడుదల చేసింది. పారదర్శక పాలన అందిస్తామని, మహిళా భద్రతకు పెద్దపీట ఇస్తామని పేర్కొంది.

మొత్తం 270 అంశాలతో ఈ విజన్ డాక్యుమెంట్‌ను విడుదల చేశారు. ఈ కార్యక్రమంలో బీజేపీ రాష్ట్ర అధ్యక్షుడు సతీశ్ ఉపాధ్యాయ్ మాట్లాడుతూ ఢిల్లీని ప్రపంచ స్థాయి సిటీగా తీర్చిదిద్దే దిశగా బీజేపీ పరిపాలన ఉంటుందని అన్నారు. అయితే ఢిల్లీకి పూర్తిస్థాయి రాష్ట్ర హోదా అంశం విజన్ డాక్యుమెంట్ లో ఎక్కడా లేదు. ఢిల్లీకి పూర్తిస్థాయి రాష్ట్ర హోదా ఇస్తామని 2013, గత ఎన్నికల్లో బీజేపీ హామీయిచ్చింది. సమగ్రాభివృద్ధి, మహిళా భద్రత, ఢిల్లీని ప్రపంచశ్రేణి నగరం తీర్చిదిద్దడం తమ ప్రాధాన్యాలని బీజేపీ సీఎం అభ్యర్థి కిరణ్ బేడీ తెలిపారు. అవినీతి రహిత పాలన అందిస్తామన్నారు.

విజన్ డాక్యుమెంట్‌లో ముఖ్యాంశాలు:

* ఢిల్లీని ప్రపంచ స్ధాయి నగరంగా అభివృద్ధి చేయడం

* రాజధాని నగరంలో మహిళల భద్రత పెంపు

* రాజధాని యువతకు ఉపాధి అవకాశాల కల్పన

* పర్యావరణం, విద్యుతు త్రాగునీరు తదితర సమస్యలపై పరిష్కారానికి కృషి

* బీజేపీ ఢిల్లీ ప్రజల కలలను సాకారం చేస్తుంది

* నిపుణుల సలహా మండలి

* శాసనసభ్యులు కోసం కొలమానాలు

* ఢిల్లీలోని అన్ని ప్రభుత్వ విభాగాల్లో అవినీతిని పారద్రోలడం

* డిజిటల్ ఇండియా - ఆన్‌లైన్, మొబైల్ టెక్నాలజీని ఉపయోగించడం

* ప్రాజెక్టుల్లో ప్రభుత్వ జోక్యం

* 24 గంటలు విద్యుత్, నీటి సరఫరా, నగరంలో రోడ్ల అభివృద్ధి