నెల్లూరు పీఆర్ కండ్రిగకు అదృష్టం పట్టింది..

Posted: 10/18/2014 03:57 PM IST

Sachin tendulkar adopted nellore village puttamraju kandriga allots rs 3 5 crores from development

శంఖంలో పోస్తేనే తీర్థం అవుతుందని పెవ్దలు చెప్పిన మాట ఎన్నటికీ తప్పుకాదు. అది నెల్లూరు జిల్లాలోని గూడూరు పట్టణానికి సుమారు 20 కిలోమీటర్ల దూరంలో ఉన్న పుట్టం రాజు వారి కండ్రిగ గ్రామం. ఆ గ్రామం పేరు నిన్న మొన్నటి వరకు చాలా తక్కువ మందికి తెలుసు. కానీ ప్రస్తుతం దేశవ్యాప్తంగా మారుమోగుతోంది. క్రికెట్ దిగ్గజం, రాజ్యసభ సభ్యుడు సచిన్ టెండూల్కర్ ఆ గ్రామాన్ని అభివృద్ధి చేసేందుకు దత్తత తీసుకోవడమే దీనికి కారణం.

ఒక పంచాయతీలో ఆవాసంగా ఉన్న ఆ గ్రామాన్ని స్వర్ణ గ్రామంగా, సకల సౌకర్యాలతో ఆదర్శ గ్రామంగా తీర్చిదిద్దబోతున్నారు సచిన్. గాంధీజీ కలలు కన్న పల్లెసీమగా, ప్రధాని నరేంద్ర మోదీ ఆశయానికి అనుగుణంగా మేక్ ఇన్ ఇండియాలో ఆ గ్రామం భాగం కాబోతోంది. పల్లెసీమ అంటే ఈ విధంగానే ఉండాలి అనేవిధంగా రూపుదిద్దేందుకు ప్రణాళికలు రూపొందాయి. దీనికి అవసరమైన నిధులు టెండూల్కర్ తన ఎంపీ కోటా నిధుల నుంచి మూడున్నర కోట్ల రూపాయలను అందించనున్నారు. మరికొన్ని సొంతగా సమకూర్చనున్నారు. ఈ అభివృద్ధి పనులను తిలకించేందుకు స్వయంగా సచిన్ టెండూల్కర్ ఆ గ్రామాన్ని సందర్శించనున్నారు. నవంబరు 16న రానున్నట్లు అధికారులకు సమాచారం అందింది.

అయితే సచిన్ పర్యటన ఇంకా ఖరారు కాలేదు. ఈ నేపథ్యంలో ఆ గ్రామాన్ని 'ఈనాడు-ఈటీవీ' బృందం శుక్రవారం పరిశీలించింది. సచిన్ టెండూల్కర్ తమ గ్రామాన్ని దత్తత తీసుకున్నారన్న సమాచారంతో గ్రామస్థులు ఉబ్బితబ్బిబ్బవుతున్నారు. కనీసం శాసనసభ్యులూ సందర్శించని తమ గ్రామానికి టెండూల్కర్ రాబోతున్నారన్న సమాచారంతో హర్షం వ్యక్తం చేస్తున్నారు. అదృష్టం పడితే.. ఎలా వుంటుందో మరికొన్ని సంవత్సరాల్లో ఈ గ్రామమే చూపుతుందని గ్రామస్థులు ధీమా వ్యక్తం చేస్తున్నారు. ఇక తమ గ్రామ అవసరాల కోసం ఏ ప్రజాప్రతినిధి వద్దకు వెళ్లాల్సిన అవసరం లేదని ధీమాతో వున్నారు. ఈ ప్రాంతం అభివృద్ది చెందాలి.. దాని ఫలాలను మరిన్ని పల్లెలకు అందించాలని మనమూ కోరుకుందాం.

జి.మనోహర్