ఆర్థులకు తెలుగు, తమిళ సినీపరిశ్రమల ఆపన్నహస్తం

Posted: 10/15/2014 03:08 PM IST

Tollywood and kollywood volentary donations to hudhud victims

హుద్‌హుద్‌ తుపాను ధాటికి విలవిలలాడిన బాధితుల పట్ల టాలీవుడ్ తో పాటు కోలీవుడ్ సినీ పరిశ్రమ ఔదార్యం చూపింది. పలువురు సినీ పరిశ్రమ పెద్దలు, నటులు తుపాను బాధితులకు తమ వంతు ఆర్థిక సాయం అందజేశారు. తెలుగు సినీపరిశ్రమ అగ్ర కథనాయకుడు, హిందూపూర్ ఎమ్మెల్యే బాలకృష్ణ తుపాను బాధితుల కోసం 30 లక్షల విరాళం ప్రకటించారు. త్వరలోనే తన విరాళాన్ని సీఎం సహాయ నిధికి ఇవ్వనున్నట్లు ప్రకటించారు. దీంతో పాటు బాధితులకు 15 లక్షల రూపాయల విలువైన బియ్యం, నిత్యావసరాలు అందజేయనున్నట్లు ప్రకటించారు.

అటు బాధితులకు తమవంతు ఆర్థిక సాయంగా అక్కినేని ఫౌండేషన్, యువ కథనాయకుడు నితిన్ కూడా తమ విరాళాలను ప్రకటించారు. అక్కినేని ఫౌండేషన్ ద్వారా రూ.20 లక్షల ఆర్థక సాయాన్ని ముఖ్యమంత్రి సహాయ నిధికి పంపనున్నట్లు తెలిపారు. అటు హీరో నితిన్ కూడా ఆర్తులకు సాయం అందించారు. తుపాను బాధితుల కోసం 10 లక్షల రూపాయలను సీఎం సహాయ నిధికి అందిస్తానన్నారు.

నిన్న రాంచరణ్ తో మొదలైన విరాళాల వెల్లువ ఇవాళ కూడా కొనసాగింది. తుపాను బాధితుల కోసం అగ్రహీరో రవితేజ 10 లక్షల రూపాయలు, ప్రకాష్ రాజ్ ఐదు లక్షల రూపాయలు, కమేడియన్ హీరో అల్లరి నరేష్ ఐదు లక్షలు, హాస్యనటుడు బ్రహ్మానందం 3 లక్షలు, యువ కథానాయకుడు సందీప్ కిషన్ రూ. 2.5 లక్షలు, సినీనటి రుకూల్ ప్రీతిసింగ్ లక్ష రూపాయల విరాళాన్ని ప్రకటించారు.

అటు ఆంధ్రప్రదేశ్ లోని ఉత్తరాంధ్రను అతలాకుతలం చేసిన హుద్ హుద్ తుపాను బీభత్సంపై కొలీవుడ్ నటులు కూడా స్పందించారు. తమ వంతు ఆర్థిక సహాయంగా బాధితులకు విరాళాన్ని ప్రకటించారు. తమిళ హీరో సూర్య కుటుంబం హుదూద్ బాధితులకు రూ.50 లక్షల ఆర్థిక సాయం ప్రకటించింది. సూర్య 25 లక్షలు, కార్తీ 12.5 లక్షలు, జ్ఞాన్వేల్ రాజా 12.5 లక్షల విరాళం అందిస్తున్నారు. వీరితో పాటు పలువురు సినీ ప్రముఖులు మేము సైతం అంటూ బాధితులకు ఆదుకునేందు ఆపన్నహ్తాన్ని అందిస్తున్నారు.

జి.మనోహర్