అర్థరాత్రి నింగిలోకి దూసుకెళ్లనున్న పీఎస్ఎల్వీ సీ- 26

Posted: 10/15/2014 10:11 AM IST

Pslv c26 to be launched in the early hours of 16th oct

భారత అంతరిక్ష పరిశోధన సంస్థ (ఇస్రో) మరో ఉపగ్రహ ప్రయోగానికి సిద్ధమైంది. గ్లోబల్ పొజిషనింగ్ సిస్టమ్ తరహాలో రూపొందించిన 'ఇండియన్ రీజినల్ నావిగేషన్ శాటిలైట్ సిస్టమ్' ఏడు ఉపగ్రహాల వరుసలో మూడో ఉపగ్రహ ప్రయోగాన్ని చేపట్టేందుకు సమాయత్తమైంది. రేపు తెల్లవారుజామున 1.32 గంటలకు పోలార్ శాటిలైట్ లాంచ్ వెహికల్-సి 26 (పీఎస్ఎల్‌వీ) ద్వారా ఐఆర్ఎన్ఎస్ఎస్-1సి ఉపగ్రహాన్ని భూస్థిర కక్ష్యలో ప్రవేశపెట్టనున్నారు. దీనికి సంబంధించి కౌంట్‌డౌన్ ప్రక్రియ షార్‌లో సోమవారం ఉదయం 6.32 గంటల నుంచి నిరంతరాయంగా కొనసాగుతోంది. 67 గంటల పాటు కౌంట్‌డౌన్ ముగిసిన వెంటనే పీఎస్ఎల్‌వీ నింగిలోకి దూసుకెళ్లనుంది.

పీఎస్ఎల్‌వీ-సి26 ఎక్స్ఎల్ తరహా రాకెట్ ప్రయోగాల్లో ఇది ఏడోది. పీఎస్ఎల్‌వీ సిరీస్‌లో 28వ ప్రయోగం. ఎక్స్ఎల్ తరహాలో చంద్రయాన్-1, రీశాట్-1, ఐఆర్ఎన్ఎస్ఎస్-1ఎ, బీలతోపాటు అంతర్జాతీయ ఖ్యాతిని గడించిన మామ్ ఉపగ్రహాన్ని కూడా ఇస్రో చేపట్టింది. కౌంట్‌డౌన్ కార్యక్రమంలో భాగంగా రాకెట్‌లో ఘన, ద్రవ ఇంధనాలను నింపుతున్నారు. ఇప్పటికే పలుమార్లు వివిధ పరీక్షలు నిర్వహించారు. పీఎస్ఎల్‌వీ ప్రాజెక్టు డైరెక్టర్ కున్హికృష్ణన్, ఐఆర్ఎన్ఎస్ఎస్-1సి ఉపగ్రహ డైరెక్టర్ నాగేశ్వరరావు, షార్ సంచాలకులు ఎంవైఎస్ ప్రసాద్ తదితరులు కౌంట్‌డౌన్‌లో పాల్గొన్నారు.

ఆదివారం తెల్లవారుజామున నిర్వహించిన పొలార్ శాటిలైట్ లాంఛ్ వెహికల్ సీ-26 వాహన నౌకకు సంబంధించిన సన్నద్ధత ప్రయోగం సక్సెస్ అయ్యింది. దీంతో ఇక ప్రయోగానికి సంబంధించిన వ్యవహారాల్లో ఇస్రో శాస్త్రవేత్తలు నిమగ్నమయ్యారు. ప్రయోగ సమయంలో చేసే పనులన్నింటినీ శాస్త్రవేత్తలు ఈ సందర్భంగా నిర్వహించారు. ఉపగ్రహ ప్రయోగాలకు ముందు ఆనవాయితీగా శ్రీవారిని దర్శించుకునే భారత అంతరిక్ష పరిశోధన సంస్థ ఛైర్మన్ రాధాకృష్ణన్ ధర్శనానంతరం షార్‌కు చేరుకున్నారు. ఆయన ఎంసీసీకి వెళ్లి కౌంట్‌డౌన్ ప్రక్రియను పర్యవేక్షించారు. శాస్త్రవేత్తలను అడిగి వివరాలను తెలుసుకున్నారు. పీఎస్ఎల్వీ సి-26ను విజయవంతంగా నింగిలోకి పంపేందుకు శాస్త్రవేత్తలు సన్నధమయ్యారు.

జి.మనోహర్