నింగిలోకి దూసుకెళ్లేందుకు సిద్దమైన మరో రాకెట్..

Posted: 10/12/2014 08:34 PM IST

ఇస్రో మరో ప్రతిష్టాత్మక ప్రయోగానికి సన్నధమైంది. పూర్తిగా దేశీయ సహకారంతో రూపొందించిన పీఎస్ఎల్వీ సి-26ను నింగిలోకి దూసుకెళ్లేందుకు రంగం సిద్దం చేసింది. శ్రీహరికోటలోని సతీష్‌థావన్ స్పేస్ సెంటర్ షార్‌లో పీఎస్ఎల్వీ సీ 26 రాకెట్ ప్రయోగానికి కౌంట్ డౌన్ ప్రారంభించనుంది. రేపు ఉదయం 6.32 నిమిషాలకు కౌంట్ డౌన్ ను ప్రారంభిస్తున్నట్లు ఇస్రో వర్గాలు వెల్లడించాయి. దాదాపు 72గంటల పాటు కౌంట్ డౌన్ కొనసాగుతుందని సమాచారం. ఈ నెల 16న పీఎస్ఎల్వీ సి-26ను విజయవంతంగా నిందిలోకి పంపేందుకు శాస్త్రవేత్తలు సన్నధమయ్యారు.

ఇవాళ తెల్లవారుజామున నిర్వహించిన పొలార్ శాటిలైట్ లాంఛ్ వెహికల్ సీ-26 వాహన నౌకకు సంబంధించిన సన్నద్ధత ప్రయోగం సక్సెస్ అయ్యింది. దీంతో ఇక ప్రయోగానికి సంబంధించిన వ్యవహారాల్లో ఇస్రో శాస్త్రవేత్తలు నిమగ్నమయ్యారు. ప్రయోగ సమయంలో చేసే పనులన్నింటినీ శాస్త్రవేత్తలు ఈ సందర్భంగా నిర్వహించారు. ప్రయోగానికి ముందుగా జరిగే మిషన్ రెడీనెస్ సమీక్ష, లాంఛ్ ఆథరైజేషన్ బోర్డు సమావేశాలు ఇవాళ నిర్వహించారు. ఈ సమావేశంలో ఇస్రోలోని అన్ని విభాగాల శాస్త్ర వేత్తలు, ప్రాజెక్టు డైరెక్టర్లు పాల్గొన్నారు.

జి.మనోహర్