మోదీని నిలదీస్తాం : టీఆర్ఎస్ నేతలు

Posted: 05/27/2014 09:25 AM IST

నరేంద్ర మోడీ మంత్రివర్గంలో తొలిసారిగా తెలంగాణకు ప్రాతినిధ్యం లేకుండా పోయింది. యుపిఏ ప్రభుత్వ హయాంలో ఉమ్మడి ఆంధ్రప్రదేశ్ నుంచి డజను మంది మంత్రులున్న పరిస్థితిని చూసిన వారికి ఇప్పుడు ఉమ్మడి రాష్ట్రం నుంచి ఒక్కరికి మాత్రమే ప్రాతినిధ్యం లభించడం నిరాశ కలిగించింది.

తెలంగాణ ఏర్పడిన తరువాత అటు సీమాంధ్ర నుంచి, ఇటు తెలంగాణ నుంచి మంత్రివర్గంలో తగిన ప్రాతినిధ్యం లభిస్తుందని రాజకీయ పక్షాలు భావించాయి. అయితే ఏ కారణం వల్లనో కానీ ఆంధ్ర నుంచి ఇద్దరికి మాత్రమే అవకాశం కల్పించిన మోదీ తెలంగాణ నుంచి ఒక్కరికి కూడా అవకాశం కల్పించలేదు.

తెలంగాణలో 17 పార్లమెంటు నియోజక వర్గాలు ఉండగా, సికింద్రాబాద్ నియోజక వర్గం నుంచి బండారు దత్తాత్రేయ ఒక్కరే గెలిచారు. గెలిచింది ఒక్కరు అయినా మంత్రివర్గంలో ఆయనకు చోటు ఖాయం అని భావించారు. కేంద్ర మంత్రివర్గంలో తెలంగాణ నుంచి ఎవరికీ ప్రాతినిధ్యం లేకపోవడం వల్ల తెలంగాణకు ఇబ్బందికరమైన పరిస్థితే అని టిఆర్‌ఎస్ నాయకులు చెబుతున్నారు.

తెలంగాణకు ఎన్‌డిఏ ప్రభుత్వంలో అన్యాయం జరిగితే పార్లమెంటులో నిలదీస్తామని టిఆర్‌ఎస్ నాయకులు చెబుతున్నారు. మేం 11 మంది ఎంపిలమున్నాం, పార్లమెంటులో మా వాణి వినిపిస్తాం అని టిఆర్‌ఎస్ ఎంపి ఒకరు తెలిపారు.

RS