మోదీ క్యాబినెట్ ఎలా ఉండబోతోంది?

Posted: 05/22/2014 05:39 PM IST

తాను స్వయంగా నిబద్ధతతో నడుస్తూ, ఛండశాసనుడిలా పనిచేసే నరేంద్ర మోదీ ప్రధానమంత్రిగా 26 న ప్రమాణ స్వీకారం చేస్తున్నారు.  ఈ లోపులో మంత్రి వర్గాన్ని నిర్ణయిస్తే వాళ్ళు కూడా ఆరోజు ప్రమాణ స్వీకారం చెయ్యగలుగుతారు కాబట్టి భాజపా ఇప్పటికే ఒక నిర్ణయానికి వచ్చివుండాలి.  అయితే మంత్రులను ఎక్కువ సంఖ్యలో నియమించకుండా పరిమితమైన సంఖ్యలో ఉంచితేనే వాళ్ళతో కలిసి ప్రభుత్వాన్ని నడపటంలో సౌలభ్యం ఉంటుందని మోదీ భావిస్తున్నట్లుగా సమాచారం.  అయితే ప్రధానమైనవారికి తప్పనిసరిగా మంత్రివర్గంలో చోటు ఇవ్వాల్సి కూడా వస్తుంది.  

ముందుగా పార్టీ జాతీయ అధ్యక్షుడు రాజ్ నాథ్ సింగ్ విషయానికి వస్తే ఆయన మూడు విధాలుగా ఆలోచిస్తున్నట్లుగా తెలుస్తోంది.  పార్టీ అధ్యక్షుడిగా కొనసాగటమా లేక హౌమ్ శాఖ కానీ, లేదంటే రక్షణ శాఖ తీసుకోవటమా అన్నది తేల్చుకోలేకపోతున్నారు.

అత్యంత సీనియర్ నాయకుడు అద్వానీ లోక్ సభ స్పీకర్ గా వ్యవహరించటానికి అంగీకరించారు.

అమృత్ సర్ లో పోటీచేసి ఓడిపోయిన సీనియర్ నాయకుడు అరుణ్ జైట్లీకి ఆర్థిక శాఖను ఇచ్చే అవకాశం ఉంది.

వాజ్ పాయ్ ప్రభుత్వంలో మానవవనరుల శాఖను తీసుకున్న మురళీ మనోహర్ జోషి ప్లానింగ్ కమిషన్ కి డెప్యూటీ ఛైర్మన్ గా బాధ్యతలు అప్పగించనున్నారు.  

రవిశంకర్ ప్రసాద్ న్యాయ శాఖా మాత్యులుగా పనిచెయ్యవచ్చు.

15 వ లోక్ సభలో ప్రతిపక్షనాయకురాలిగా వ్యవహరించి అందరి మన్ననలందుకున్న సుష్మా స్వరాజ్ విదేశాంగ శాఖను చేపట్టవచ్చు.

ఇవీ సీనియర్ నాయకుల పోర్ట్ ఫోలియోస్.  ఇక మిగిలిన నాయకులు, ఎన్డియే కూటమిలోని వారికి ఏమేం పదవులు కట్టబెట్టబోతున్నారన్నది ముందుగా భాజపా సీనియర్ నాయకుల విషయంలో నిర్ణయానికి వచ్చిన తర్వాత తెలుస్తుంది.  ఆంధ్రప్రదేశ్ నుంచి గెలిచిన తెదేపా భాజపా ఎంపీలకు కూడా సముచిత స్థానం లభిస్తుందని సమాచారం.  

-శీజ