జగన్ పత్రికను నిషేధించండి-తెదేపా

Posted: 04/26/2014 09:36 AM IST

వైయస్ ఆర్ కాంగ్రెస్ పార్టీ అధ్యక్షుడు వైయస్ జగన్ వార్తా పత్రికలో చేసిన ప్రచురణలు ఎన్నికల నిబంధనావళిని ఉల్లంఘిస్తున్నాయని, గతంలో కూడా అలాగే చేసారని, అలా మళ్ళీ మళ్ళీ నేరానికి పాల్పడటం వలన ఆ పత్రికను ఎన్నికల పరిసమాప్తమయ్యేంత వరకు నిషేధించవలసిందిగ ఎన్నికల కమిషన్ కి తెలుగు దేశం పార్టీ నాయకుడు, పొలిట్ బ్యూరో సభ్యుడు యనమల రామకృష్ణ విజ్ఞప్తి చేసారు.

యనమల రామకృష్ణుడు చేసిన ఫిర్యాదు ప్రకారం ఆ పార్టీ సొంత పత్రిక లో నాలుగు పేజీలను కేవలం నిజాన్ని వక్రీకరించి తమకు అనుకూలంగాను, తెలుగు దేశం పార్టీకి వ్యతిరేకంగానూ రాయటానికే కేటాయించింది, లోగడ ఆ పత్రికలో ఏప్రిల్ 2, 11, 24 తేదీల్లో కూడా అలాగే చేసింది.

ఆ వార్తా పత్రిక జర్నలిజంలోని అన్ని హద్దులనూ మీరిందని, కేవలం వైయస్ ఆర్ పార్టీ కరపత్రంలా తయారైందని తెదేపా నాయకుడన్నారు.  ఇంతవరకు ప్రచురితమైన అటువంటి కథనాలను పెయిడ్ న్యూస్ గా లెక్కించి ఆ పార్టీ ఎన్నికల ఖర్చుగా పరిగణించాలని తెదేపా ఎన్నికల కమిషన్ ని కోరుతోంది. 

-శ్రీజ