ఆత్మబలిదానాలను అన్ని పార్టీలూ వాడుకుంటున్నాయి

Posted: 04/16/2014 12:53 PM IST

చెట్టుకి కాయలు కాసి పండ్లవుతే వాటి ప్రయోజనం కలిగేది ఆ చెట్టుకి కాదు.  "మా పంట పండింది" అని అనుకుంటారు దాని మీద అధికారం ఉందనుకున్నవాళ్ళు, వాటిని ఆశించేవాళ్లు, వాటిని అపహరించాలని చూసేవాళ్ళు కూడా. 

అలాగే, ప్రత్యేక తెలంగాణా రాష్ట్రాన్ని సాధించాలని నిజంగా ఆత్మబలిదానాలు చేసిన వారి త్యాగఫలం తెలంగాణా రాష్టంగా ఆవిర్భవిస్తే, ఆ ఫలాలను అందుకోవాలని అన్ని పార్టీలూ ఆశించటం రాజకీయంగా చూస్తే ఆశ్చర్యం ఎంతమాత్రమూ కలిగించదు.

మా తెలంగాణా బిడ్డల ఆత్మబలిదానాలు మీకు కనిపించలేదా అంటూ తెలంగాణా రాష్ట్ర సమితి మొన్నటి వరకూ ప్రతి పార్టీనీ ప్రశ్నించింది.  నాలుగు మట్టిబొమ్మలు పగిలిపోతే ఇంత రాద్దాంతం చేస్తున్నరు మరి అంతమంది చేసిన ప్రాణత్యాగానికి విలువలేదా అని ఇలా ఎన్నో విధాలుగా వాడుకున్న సందర్భాలున్నాయి.  ఎన్నోసార్లు అమరులకు నివాళులర్పించిన సందర్భాలున్నాయి. 

అలాగే కాంగ్రెస్ పార్టీ కూడా రాష్ట్ర విభజనకు ఆమోదముద్ర పడగానే అమరులకు నివాళులర్పించారు.  ఈరోజు కాంగ్రెస్ పార్టీ ఏర్పాటు చేసిన సోనియాగాంధీ బహిరంగ సభకు తెలంగాణా కోసం ప్రాణ త్యాగం చేసిన అమరుల కుటుంబాలను సోనియా గాంధీ ప్రత్యేకంగా కలిసి వారికి హామీలేవో ఇవ్వనున్నారు.  కెసిఆర్ ఫాం హౌస్ లో కూర్చుని ప్రజలను రెచ్చగొట్టి బలిదానాలు చేసేట్టుగా ప్రేరేపించారంటూ జైరాం రమేష్ ఆరోపించారు. 

ఈరోజు భారతీయ జనతా పార్టీ రాష్ట్ర అధ్యక్షుడు మాట్లాడుతూ, నువ్వెక్కడైనా మునుగు కానీ తెలంగాణా ప్రజలను మాత్రం ముంచకంటూ తెరాస అధ్యక్షుడు కెసిఆర్ ని హెచ్చరిస్తూ, మునగటానికి, మరోసారి బలిదానాలు చెయ్యటానికి తెలంగాణా ప్రజలు సిద్ధంగా లేరు అన్నారు. 

ప్రాణత్యాగాలు చేసినవారి కలలు ఎంతవరకు నెరవేరాయో తెలియదు కానీ వాటిని రాజకీయ లబ్ధికి ఉపయోగించుకుంటూ అన్ని పార్టీలూ, అందుకు ఇతర పార్టీలే కారణమని చెప్తున్నాయి.  ఇతర పార్టీల వైఖరి వలనే ప్రాణత్యాగాలు జరిగాయంటూ ప్రతి పార్టీ ఇతర పార్టీల మీద నెపం వేసి ఆ సెంటిమెంట్ ని వాడుకుందామనుకుంటున్నాయి. 

ఇదే, పంటకొచ్చిన తర్వాత లబ్ధిదారులు వేరే వుంటారని చెప్పటానికి ఉదాహరణ.  తెలంగాణా ఫలం త్యాగాలు చేసినవారిదీ కాదు, ఏ ప్రజలకోసం త్యాగాలు చేసారో వారిదీ కాదు.  కేవలం అధికారం కోసం వచ్చే రాజకీయ పార్టీలకు ఉపయోగపడేది!

-శ్రీజ