బాలయ్య నామినేషన్ కి పెట్టిన ముహూర్తం

Posted: 04/15/2014 04:37 PM IST

సినీ కథానాయకుడు నందమూరి బాలకృష్ణ క్రియాశీల ఈసారి రాజకీయాలలోకి రావటానికి నిర్ణయించుకోవటం, అందుకు తెలుగు దేశం పార్టీ అధినాయకుడు సీటు కేటాయించటం జరిగిపోయింది.  ఇక ఇప్పుడు చెయ్యవలసింది నామినేషన్ దాఖలు చెయ్యటం, ఎన్నికల ప్రచారంలో పాల్గొనటమే.  ఆయన నామినేషన్ దాఖలు చెయ్యటానికి పండితవర్యులచేత సుముహూర్తాన్ని నిర్ణయించారు.  అది, బుధవారం, ఏప్రిల్ 16 ఉదయం గం.11.31 ని. లకు.

సోమవారం బిఫార్మ్ అందుకున్న బాలకృష్ణ బుధవారం ముందుగా హిందుపురంలోని ప్రఖ్యాత సుగురు ఆంజనేయ స్వామి ఆలయంలో పూజాదులు నిర్వహించి, అక్కడి నుండి నామినేషన్ వెయ్యటానికి అభిమానులతో కలిసి ర్యాలీగా వెళ్తారు. 

లెజెండ్ సినిమా నిర్మాణంలో వ్యస్తులై ఉండటం వలన అంతకుముందు బాలకృష్ణ ఎన్నికలలో పోటీచేస్తారా లేదా అన్న అనుమానం అందరిలోనూ ఉండేది.  అందుకు తగ్గట్టుగా బాలయ్య కూడా బావగారు ఎలా చెప్తే అలా అంటూ నిర్ణయాన్ని చంద్రబాబు నాయుడు మీదనే వేసారు.  హిందూపురం నుంచి ఎన్నికల బరిలోకి బాలయ్య దిగుతున్నారని తెలియగానే ఆయన అభిమానులలో సంతోషం పెల్లుబికింది. 

సర్వేలని బట్టి చూస్తే తెదేపాకి గెలుపు ఖాయమని తెలుస్తోంది.  ప్రస్తుతం నెలకొనివున్న పరిస్థితులనుబట్టి చూస్తే బాలకృష్ణ అక్కడి నుంచి గెలవటానికి ఆట్టే శ్రమపడనక్కర్లేదు.  అంటే చంద్ర (బాబు) బలానికి తారాబలం తోడవుతోంది! 

-శ్రీజ