తనపై దాడి చేసిన వ్యక్తిని కలిసిన కేజ్రీవాల్

Posted: 04/09/2014 02:45 PM IST

అరవింద్ కేజ్రీవాల్ తనపై దాడిచేసిన ఆటో డ్రైవర్ లాలిని హాస్పిటల్ లో కలిసి మాట్లాడారు.  ఆమ్ ఆద్మీ పార్టీ నిర్వాహకుడు కేజ్రీవాల్ మీద ర్యాలీలు రోడ్ షోలలో అనేకమార్లు దాడి జరిగింది.  ఢిల్లీ సుల్తాన్ పురిలో చేసిన దాడిలో కేజ్రీవాల్ మద్దతుదార్ల చేతిలో చావు దెబ్బలు తిని హాస్పిటల్ పాలైన లాలిని చూడటానికి వెళ్ళారాయన. 

ఆరోజు రోడ్ షోలో కేజ్రీవాల్ కి దండవేసి మరీ దవడమీద కొట్టిన ఆటోడ్రైవర్ లాలి కేజ్రీవాల్ ని చూడగానే భోరుమని ఏడ్చి తాను పెద్ద తప్పు చేసానని, తనని క్షమించమని కోరుకున్నాడు.  అతని కుటుంబ సభ్యులు కూడా, లాలి ఆఆపా అభిమానని, ఆ రోజు అలా ఎందుకు ప్రవర్తించాడో అర్థం కావటం లేదని అన్నారు. 

కేజ్రీవాల్, తన మీద దాడి చేసిన వారిని దండించవద్దని, వాళ్ళని కొడితే వాళ్ళకీ మనకీ తేడా ఏమిటని అన్నారాయన.  ఆ తర్వాత ఢిల్లీ దక్షిణపురిలో తన మీద దాడి చేసిన అబ్దుల్ వాహిద్ ని కూడా కలిసిన కేజ్రీవాల్, రాజకీయ ప్రత్యర్థుల వ్యూహం ప్రకారమే ఆ దాడులు జరిగాయన్నారు.

దీనికి సంబంధించిన వార్తా కథనం

-శ్రీజ