ఇతరుల ఘనతని తన ఖాతాలో చేసుకునే భాజపా- రాహుల్

Posted: 03/07/2014 10:58 AM IST

Bjp snatches credit of others says rahul gandhi

ఎన్నికల ప్రచారంలో మహారాష్ట్రలో పర్యటిస్తున్న జాతీయ కాంగ్రెస్ పార్టీ ఉపాధ్యక్షుడు రాహుల్ గాంధీ మహాత్మా గాంధీని హత్య చేసింది ఎవరో కాదు ఆర్ఎస్ఎస్ అని థానేలో జరిగిన బహిరంగ సభలో అన్నారు.

సర్దార్ పటేల్, గాంధీలను వ్యతిరేకించినవారు, గాంధీని హత్య చేసిన ఆర్ఎస్ఎస్ అయితే ఇప్పడు భాజపా వాళ్ళిద్దరి పేర్లను చెప్పుకుంటోందని రాహుల్ అన్నారు.

ఇతరుల ఘనతను తమ ఖాతాలో వేసుకునే అలవాటున్న భాజపా ఇప్పుడు దేశంలో కంప్యూటర్లను తీసుకొచ్చి అభివృద్ధి చేసింది తమ పార్టీయేనని చెప్పుకుంటోంది. నిజానికి కంప్యూటర్లను భారతదేశానికి తీసుకునివచ్చి అభివృద్ధి చేసినవారు రాజీవ్ గాంధీ, శామ్ పిత్రోదాలు. అప్పుడొక సీనియర్ ప్రతిపక్ష నాయకుడు రాజీవ్ గాంధీ కంప్యూటర్ల గురించి మాట్లాడటమెందుకు అని ప్రశ్నించారు కూడా. కానీ ఇప్పుడు చూడండి పది సంవత్సరాలలో కంప్యూటర్ల వలన భారతదేశం ఎక్కడి నుండి ఎక్కడికి వెళ్ళిందో అన్నారు రాహుల్ గాంధీ. అప్పుడేమో కంప్యూటర్లు వస్తే మనుషుల పొట్టమీద కొడుతుందని, ఉపాధి కోల్పోవటం జరుగుతుందని అన్నారు, ఇప్పుడేమో వాటిని తెచ్చింది తామే అంటున్నారు అన్నారు రాహుల్.

కంప్యూటర్ ఘనతను తమ ఖాతాలో వేసుకుంటున్నట్లే మరో ఐదారు సంవత్సారుల పోతే గ్రామీణ ఉపాధి హామీ (ఎన్ఆర్ఇజిఏ), సమాచార హక్కు (ఆర్ టి ఐ) కూడా తమ వలన వచ్చిందనే చెప్పుకుంటారంటూ రాహుల్ గాంధీ భారతీయ జనతా పార్టీని విమర్శించారు.

60 సంవత్సరాలలో కాంగ్రెస్ పార్టీ చెయ్యలేనిది మేము మూడు నెలలో చేసి చూపిస్తామని భాజపా నేతలు అంటున్నారు అది ఎలా సాధ్యమౌతుంది అని రాహుల్ గాంధీ తన రెండు రోజుల మహారాష్ట్ర పర్యటనలోని రెండవ రోజున జరిగిన సభలో ప్రశ్నించారు.

-శ్రీజ