విభజన బిల్లుకి వ్యతిరేకంగా సీమాంధ్రలో బంద్

Posted: 02/13/2014 07:31 AM IST

ఏపిఎన్జీవో సంఘం పిలుపు మేరకు ఈ రోజు సీమాంధ్రలో బంద్ పాటిస్తున్నారు.  దీనికి తెలుగు దేశం పార్టీ మద్దతు ప్రకటించింది. ఫోటోలో తిరుపతిలో సమైక్యరాష్ట్రానికి మద్దతుగా విద్యార్థుల మానవహారం. ఉదయం 9 గంటల నుంచి సాయంత్రం 5 గంటల వరకు పెట్రోల్ పంపులను మూసివేయటానికి పెట్రోల్ డీలర్ల సంఘం నిర్ణయం తీసుకుని ఆ మేరకు ప్రకటన చేసింది.

కడప జిల్లాలోని 8 డిపోల్లోని 900 బస్సులు డిపోలకే పరిమితమైవున్నాయి.  కడప బస్ స్టాండ్ లో బస్సులను అడ్డుకుంటున్నారు ఆందోళనకారులు.  ఆర్టీసీ బస్సులు నిలిచిపోవటం ప్రయాణీకులకు ఇబ్బందులను కలిగిస్తోంది.

తూర్పుగోదావరి జిల్లాలో బంద్ కు మద్దతు తెలిపిన అన్ని సంఘాలు, వర్గాలు స్వచ్ఛందంగా బంద్ ను పాటిస్తున్నాయి.  వ్యాపార వాణిజ్య విద్యా సంస్తలు సెలవులను ప్రకటించగా డిపోలకు పరిమితమైన బస్సులు, ఇతర బస్సులను అడ్డుకోవటం వలన రాకపోకలు పూర్తిగా నిలిచిపోయాయి. 

ఈ రోజు లోక్ సభలో మధ్యాహ్నం 12 గంటలకు రాష్ట్ర విభజన బిల్లును ప్రవేశపెడదామనుకుంటోంది కేంద్ర ప్రభుత్వం.  సొంత పార్టీ నుంచి వ్యతిరేకత, విపక్షాలు పెట్టిన ఆంక్షల దృష్ట్యా లోక్ సభలోకి రానున్న బిల్లుతో కలిగే పర్యవసానాల విషయంలో సర్వత్రా ఉత్కంఠను రేకెత్తిస్తున్నది.

-శ్రీజ